საპატრიარქოს საზოგადოებასთან ურთიერთობის სამსახურის ხელმძღვანელის, დეკანოზი ანდრია ჯაღმაიძის განცხადებით, ყოფილ პრეზიდენტი მისი ჯანმრთელობის მდგომარეობის გაუარესებაზე თავად იქნება პასუხისმგებელი, ვინაიდან მას “არ ავალდებულებენ შიმშილობას”.
როგორც ჯაღმაიძემ TV პირველის ეთერში განაცხადა, საპატრიარქო მიხეილ სააკაშვილს ა ასევე, ყველა მოშიმშილე პატიმარს შიმშილობის შეწყვეტისკენ მოუწოდებს და ეს ეკლესიის მსახურის ვალდებულებაა.
“ალბათ, თავად იქნება პასუხისმგებელი, მან გადაწყვიტა შიმშილობა, მას არ ავალდებულებენ შიმშილობას. საპატრიარქოს რაც შეეხებოდა, ჩვენ მას მოვუწოდეთ, ნებისმიერ მოშიმშილეს მოვუწოდებთ, ეს არის მისი ჯანმრთელობისთვის საზიანო. საკუთარი ჯანმრთელობის დაზიანება არაა ქრისტიანულად გამართლებული აქტი, ამიტომ ყოველ ჯერზე, როდესაც მსგავსი შემთხვევა იქნება, ნებისმიერი სასულიერო პირის ვალდებულება იქნება, რომ მოუწოდებს ადამიანს, თავის ჯანმრთელობას [ნუ აზიანებს],” – თქვა ჯაღმაიძემ.
მისივე თქმით, ყველა ადამიანს, მათ შორის მიხეილ სააკაშვილს სათანადოდ უნდა უმკურნალონ, ხოლო რაც შეეხება სამოქალაქო კლინიკაში გადაყვანას, ეს შეფასების ნაწილია.
“გადაიყვანონ – უკვე არის პოლიტიკური განცხადება, რადგან აქ არის მთელი ჭიდაობა. ნუ ჩამრთავთ”, – თქვა მან.
ცნობისთვის, მესამე პრეზიდენტი, რომელიც ამჟამად გლდანის მე–18 სამკურნალო დაწესებულებაში იმყოფება, მე–47 დღეა შიმშილობს. მიხეილ სააკაშვილმა სამედიცინო მომსახურებასა და მედიკამენტების მიღებაზე უარი განაცხადა. ყოფილმა პრეზიდენტმა შიმშილობის შეწყვეტის პირობად მისი სამოქალაქო კლინიკაში გადაყვანა დაასახელა, თუმცა პენიტენციური სამსახური აცხადებს, რომ მე–18 დაწესებულებაში პაციენტისთვის ყველა საჭირო პირობაა შექმნილი და სხვა კლინიკაში მისი გადაყვანის საჭიროება არ დგას.