ბულგარეთის საფეხბურთო კავშირის პრეს-სპიკერმა, ვიქტორ იგნატოვმა გამოცემა „ნოვასთან“ ისაუბრა იმ ავარიის შესახებ, რომელიც ბულგარეთის ნაკრებს გუშინ, ღამით, თბილისში შეემთხვა.
საქართველოს დედაქალაქში ორი სამფეროვანი ავტობუსი ერთმანეთს შეეჯახა, რის შედეგადაც მძიმედ დაშავდა თოდორ ნედელევი. პლოვდივის „ბოტევის“ ფეხბურთელს თავის ქალას ოპერაცია ჩაუტარდა.
„მადლობა ღმერთს, თოდორ ნედელევი დასტაბილურდა. მთელი ღამე საავადმყოფოს წინ ვიდექით. ოპერაცია დასჭირდა, თავის ქალას ოპერაცია, რადგან იყო გატეხილი. მადლობა ღმერთს, ყველა მონაწილეს რეაქცია იყო ძალიან სწრაფი, ადეკვატური და მჯერა, რომ ეს გადამწყვეტია მისი სწრაფი გამოჯანმრთელებისთვის. რა თქმა უნდა, ყველა შოკირებულია. შეუძლებელია ასეთი რამის აღწერა, თუ არ გამოგიცდია. ჩვენ ნამდვილად შოკირებული ვიყავით მომხდარით“, – განუცხადა იგნატოვმა „ნოვას“.
„ჩემი აზრით და ექიმების თქმით, თოდორ ნედელევის სიცოცხლეს საფრთხე ემუქრებოდა, მაგრამ ასეთი სწრაფი რეაქციის წყალობით ყველაფერი უკვე კონტროლის ქვეშაა. ყველაზე ოპტიმისტური პროგნოზი არის ის, რომ სამ თვეში ის სრულად გამოჯანმრთელდება, მაგრამ ჯერ-ჯერობით გამოჯანმრთელებაში ყველაზე მნიშვნელოვანი ის არის, რომ აქ ერთი კვირა მაინც დარჩება ექიმების მეთვალყურეობის ქვეშ, რის შემდეგაც გადაყვანილი იქნება ბულგარეთში და გააგრძელებს მკურნალობას. ფიზიკურად სხვა არავინ დაშავებულა და მოედანს დაუბრუნდება“, – ამბობს ვიქტორ იგნატოვი.