უკრაინის პრეზიდენტმა კიდევ ერთხელ განაცხადა, რომ მზად არის ვლადიმერ პუტინთან მოლაპარაკებებისთვის. ამის შესახებ ვოლოდიმირ ზელენსკიმ დანიურ მედიასთან გამართულ ონლაინ პრესკონფერენციაზე განაცხადა.
მისივე თქმით, დღეს მხოლოდ პუტინი წყვეტს, შეჩერდება თუ არა რუსეთის არმია.
„რუსეთს თუ ომის დასრულება სურს, რადგან მედიით ისინი სწორედ ამას ამბობენ, ისინი მოლაპარაკების მაგიდასთან უნდა დასხდნენ. უკრაინის შესახებ მოლაპარაკების მაგიდა უკრაინის გარეშე შეუძლებელია. ამიტომ, ეს მოლაპარაკებები უნდა იყოს პირდაპირი. შეგვიძლია ვისაუბროთ შუამავლებით, ან შუამავლების გარეშე – ჩემთვის სულერთია. რუსეთის ფედერაცია თუ მზადაა ომის დასასრულებლად, გამოდის მზადაა ჩვენი ტერიტორიების დასატოვებლად. ნებისმიერ მომენტში ასეთი ფორმატისთვის მე პირადად მზად ვარ“, – აღნიშნა ზელენსკიმ.
კომენტარები