აშშ-ს რომ არ ემოქმედა, ევროპაში იქნებოდა ქაოსი, – ეს განცხადება აშშ-ის პრეზიდენტმა ჯო ბაიდენმა „ესოშიეთედ პრესთან“ ინტერვიუში გააკეთა.
მისი თქმით, უკრაინის დაცვას ექნება თავისი ფასი და ეს უკვე აისახა საწვავის გაძვირებაში.
„მე მკაფიოდ ვთქვი, რომ უკრაინის დახმარება, ნატო-ს ორგანიზება უკრაინის დასახმარებლად – ყველაფერ ამისთვის საფასურის გადახდა მოგვიწევს. ეს ყველაფერი უსასყიდლოდ არ მოხდება, მაგრამ ჩვენ გვქონდა არჩევანი, არაფერი გაგვეკეთებინა და ეს უარესი იყო. პუტინი რომ შესულიყო უკრაინაში, დაეკავებინა უკრაინა, და ბელარუსი, ეს იქნებოდა საფრთხე ნატო-სთვის და ყველაფერი იქნებოდა გაცილებით ცუდად“, – განაცხადა ბაიდენმა.
მისი თქმით, უკრაინის თაობაზე გადაწყვეტილების მიღების დროს მას „პოლიტიკური გადარჩენის“ მიზანი არასდროს ამოძრავებდა.
„მე ვხელმძღვანელობ ქვეყნის ინტერესებიდან გამომდინარე. წარმოიდგინეთ, რა მოხდებოდა, თუ ნატო, რომელიც გახლავთ უძლიერესი ალიანსი, უბრალოდ უგულვებელყოფდა რუსეთის აგრესიას, როდესაც 100 000-ზე მეტი ჯარისკაცი უკრაინის საზღვარს კვეთს, რათა მოახდინოს ოკუპაცია და ამოძირკვოს მთელი ერის კულტურა. რა მოხდებოდა შემდეგ? რა უნდა გვექნა შემდეგ?“ – განაცხადა ბაიდენმა.
ბაიდენის თქმით, აშშ-ს რომ არ ემოქმედა ევროპაში, ქაოსი დაიწყებოდა.
„ჩვენ ვნახავდით შესაძლებლობას, რომ რუსები წინ წასულიყვნენ. თქვენ უკვე ნახეთ, რას აკეთებენ ისინი ბელარუსში. რა მოხდებოდა ირგვლივ მდებარე ქვეყნებში. რა მოხდებოდა პოლონეთსა და ჩეხეთში და ნატო-ს წევრ ყველა ქვეყანაში. თქვენ მოისმინეთ პუტინის მიერ დასახელებული მიზეზი, რომ ის უკრაინაში შევიდოდა, რადგან მას სურდა, ისინი ნატო-ში არ შესულიყვნენ. მას სურდა ნატო-ს ფინეთიზაცია და შედეგად მიიღო ფინეთის ნატოზაცია“, – განაცხადა ბაიდენმა.