ევროპული საბჭოს პრეზიდენტმა, შარლ მიშელმა განაცხადა, რომ „დიდი შვიდეულის“ შეხვედრაზე, სხვა საკითხებთან ერთად, ისაუბრებენ სასურსათო უსაფრთხოებაზე, რომელიც მზარდი გლობალური პრობლემაა.
„კრემლი იყენებს საკვებს, როგორც ომის ჩუმ იარაღს. ჩვენ მტკიცედ უნდა დავუპირისპირდეთ რუსეთის პროპაგანდასა და ქმედებებს სურსათისა და სასუქების ფასების სფეროში. გლობალურ სასურსათო კრიზისზე რუსეთის სახიფათო პოლიტიკაა პასუხისმგებელი. რუსეთი უზარმაზარ ტანჯვას აყენებს უღარიბეს ქვეყნებსა და დაბალშემოსავლიან ოჯახებს. ამ პოლიტიკის შედეგი პორტების ბლოკირება და სასოფლო-სამეურნეო ინფრასტრუქტურის განადგურებაა. ისინი ხორბლის მინდვრებს საომარ მინდვრებად აქცევენ. ოჯახები… ბავშვები… შიმშილის საფრთხის წინაშე დგანან. ხალხს ეს საკვები ახლა სჭირდება და დრო იწურება. ამიტომ ევროკავშირი უკრაინის სოფლის მეურნეობის პროდუქტების ალტერნატიულ მარშრუტებზე მუშაობს“, – განაცხადა შარლ მიშელმა.