მცხეთის საქალაქო სასამართლოში 28 ივლისს ცხვარიჭამიაში მოკლული 20 წლის, ახალგაზრდა კაცის საქმეზე პირველი სასამართლო სხდომა იმართება. ამ სხდომაზე პროკურორმა ისაუბრა იმ ღამით, დაბადების დღის წვეულებაზე განვითარებული მოვლენების შესახებ, რაც ამ ეტაპზე გამოძიებით არის დადგენილი.
“დაახლოებით, ღამის 02:10 საათზე დაბადების დღეზე მყოფ გიორგი ხორავას ერთ-ერთი სტუმარი, მირიან კუკავა [დაღუპული] შემთხვევით მიეჯახა მხარზე. ამ უმნიშვნელო საბაბით გაღიზიანებულმა გიორგი ხორავამ მის მეგობრებთან ერთად, დავით ჯიჯეიშვილთან [მკვლელობაში ბრალდებული] და გიორგი კუჭავასთან ერთად დაიწყო გინება აგარაკის ტერიტორიაზე მყოფი სტუმრების მისამართით… მათ შორის, დავით ჯიჯეიშვილი დანის გამოყენებით აგრძელებდა ხულიგნურ ქმედებებს და ეს ხულიგნური ქმედებები ასევე განაგრძო აგარაკის გარეთ ტერიტორიაზე, რა დროსაც დავით ჯიჯეიშვილმა მირიან კუკავას შურისძიების მოტივით, მოკვლის მიზნით გულ-მკერდისა და ბარძაყის არეში დანის გამოყენებით მიაყენა ჭრილობები”, – თქვა პროკურორმა.
განზრახ მკვლელობის ბრალდებით დაკავებული დავით ჯიჯეიშვილი ბრალს ნაწილობრივ აღიარებს. ამის შესახებ მან თავად უთხრა მოსამართლეს. მისთვის პროკურატურა პატიმრობის შეფარდებას ითხოვს.