ცხვარიჭამიაში 28 ივლისს მომხდარი მკვლელობის საქმეზე დაკავებული დავით ჯიჯეიშვილი ამბობს, რომ 20 წლის ახალგაზრდა კაცი, მირიან კუკავა იმ ღამეს მის მიერ მიყენებული ჭრილობებით გარდაიცვალა. მან სასამართლოში მიმდინარე სასამართლო პროცესზე ბრალი ნაწილობრივ აღიარა.
“ხულიგნობაში თავს დამნაშავედ არ ვცნობ, მაგრამ ვაღიარებ, რომ ჩემი მიყენებული ჭრილობებით გარდაიცვალა…” – თქვა ბრალდებულმა დავით ჯიჯეიშვილმა.
მოსამართლის დამაზუსტებელ კითხვაზე, ის აღიარებდა თუ არა განზრახ მკვლელობას, ბრალის იმ კვალიფიკაციას, რომელიც მას პროკურატურამ წაუყენა, პასუხის გაცემის დროს მისი ადვოკატი ჩაერთო.
“კვალიფიკაციებში გაცნობიერებული არ არის, პირველად არის სხდომაზე”, – თქვა ადვოკატმა.
სასამართლო მისთვის აღკვეთის ღონისძების შეფარდების საკითხს განიხილავს. პროკურატურა პატიმრობის შეფარდებას ითხოვს.