პოლიტიკოსი ჯაბა ჯიშკარიანი “ნაციონალურ მოძრაობის” წევრებს მოუწოდებს, პარტია დაშალონ და პოლიტიკური ცხოვრებიდან გავიდნენ. ამის შესახებ ჯაბა ჯიშკარიანმა “ჯორჯიან თაიმსის” საინფორმაციო-ანალიტიკურ გადაცემა “ტელეგრამში” განაცხადა.
ჯიშკარიანი საზოგადოებას “ნაციონალური მოძრაობის” მმართველობის პერიოდსაც ახსენებს და ამბობს, რომ ამ პარტიას პოლიტიკაში ყოფნის მორალური უფლება არ აქვს.
რაც შეეხება ყოფილი პრეზიდენტის პოლიტიკიდან შესაძლო წასვლას, ჯიშკარიანი ამბობს, რომ მიხეილ სააკაშვილი არასდროს ამბობს იმას, რის მოქმედებასაც აპირებს.
“რა თქმა უნდა, ეს არის თავიდან ბოლომდე თამაშის ნაწილი რეალურად ის არასდროს არ ამბობს იმას, რასაც ფიქრობს. რაც შეეხება მის თანამებრძოლებს, მე მათ ვურჩევდი, რომ პარტია დაშალონ, ქართველ ხალხს ბოდიში მოუხადონ და პოლიტიკიდან წავიდნენ აბსოლუტურად სრული შემადგენლობით. მათ არ აქვთ მორალური უფლება, რაიმე სახის პოლიტიკური საქმიანობა აწარმოონ და ქართველ ხალხს უკეთეს მომავალზე ესაუბრონ.
წარსულში მათ კარგად გვანახეს, სად აცხოვრეს ქართული საზოგადოება. ეს იყო სრული ჯოჯოხეთი, ცინიზმი, ძალადობა, ბოღმით ნამართი პოლიტიკა, დიქტატურა და აღარ ვიტყვი, როგორ ექცეოიდნენ პატიმრებს. ამიტომ, მათ მიერ გაკეთებული განცხადებებს არანაირი ფასი არ აქვს,”- აცხადებს ჯაბა ჯიშკარიანი.
როგორც ჯიშკარიანი აცხადებს, “ნაციონალური მოძრაობის” პოლიტიკაში ყოფნის ერთადერთი მიზანი რევანშის გზით ხელისუფლებაში დაბრუნებაა, რათა ქართველ ხალხს გადაუხადონ სამაგიერო 2012 წელს მათ მიერ გაკეთებული არჩევანის გამო.
ინფორმაციისთვის, რამდენიმე დღის წინ, მესამე პრეზიდენტის, მიხეილ სააკაშვილის ადვოკატმა, ვალერი გელბახიანმა განაცხადა, რომ რომ ყოფილი პრეზიდენტი იმიჯნება ქართულ პოლიტიკას და „ნაციონალურ მოძრაობასთან“ კავშირს წყვეტს. მანვე დასძინა, რომ მიხეილ სააკაშვილს საქართველოსთან მიმართებაში პოლიტიკური გეგმები არ გააჩნია.