საქართველოს კალათბურთელთა ნაკრებმა მოქმედ მსოფლიო ჩემპიონ ესპანეთთან ორ თვეში მეორე მატჩი გამართა. 4 ივლისს მუნდიალის შესარჩევ ეტაპზე თბილისში, ამჯერად ევრობასკეტის მეორე ტურში. პირველ შემთხვევაში ილიას ზუროსის გაწვრთნილმა გუნდმა 82:76 გაიმარჯვა, 3 სექტემბერს კი დამარცხდა – 64:90.
მატჩის წინ მთავარი შეკითხვა გოგა ბითაძის ჯანმრთელობას ეხებოდა. მან კოჭის ტრავმა ბელგიასთან შეხვედრაში მიიღო. თუმცა კითხვები ნაწილობრივ მატჩის სტარტზე მოიხსნა – ბითაძე სასტარტო ხუთეულში გამოჩნდა, რაც იმას ნიშნავდა, რომ ტრავმა სერიოზული არ არის.
საქართველომ ტანმაღალი ხუთეულით დაიწყო: ბითაძე-შერმადინი-მამუკელაშვილი. თუმცა ასე ვეღარ განაგრძო. ზუროსმა ბითაძე თამაშიდან მალევე მოხსნა – ცენტრის პოზიციაზე მთლიანად გიორგი შერმადინი დატვირთა. თავის მხრივ ესპანეთიც ტანამღალი გუნდია, მაღალ ტემპში თამაშზე მეტად აქცენტს პოზიციურ თამაშზე აკეთებს.