ციურიხის პოლიცია ადასტურებს, რომ პირი, რომელმაც გუშინ ქალაქის ისლამურ ცენტრში სამი ადამიანი დაჭრა, გარდაცვლილია. მისი ცხედარი შემთხვევის ადგილთან ახლოს იპოვეს. ცნობილია, რომ მან 18 დეკემბერს მკვლელობაც ჩაიდინა.
სამართალდამცველებმა პრესკონფერენციაზე განაცხადეს, რომ ისლამურ ცენტრში მყოფებზე თავდასხმა 24 წლის შვეიცარიელმა ჩაიდინა. მან მომხდარის შემდეგ სიცოცხლე თვითმკვლელობით დაასრულა. პოლიციის ხელთ არსებული ინფორმაციით, თავდამსხმელი დაჯგუფება „ისლამურ სახელმწიფოსთან“ დაკავშირებული არ ყოფილა.
გუშინ დაჭრილ სამ ადამიანს საავადმყოფოში ოპერაცია ჩაუტარდა და მათ სიცოცხლეს საფრთხე აღარ ემუქრება. 19 დეკემბერს საღამოს უცნობმა მამაკაცმა ისლამურ სამლოცველოში, სადაც ათამდე ადამიანი იმყოფებოდა, ცეცხლი გახსნა, რის შემდეგაც სამი ადამიანი დაიჭრა. მოგვიანებით პოლიციამ ამავე რაიონში ერთი ადამიანის გვამიც აღმოაჩინა.