სიღნაღის რაიონში მკვლელობა მოხდა. არსებული ინფორმაციით, ძმამ საკუთარი და დაჭრა, რომელიც მიყენებული ჭრილობების შედეგად ადგილზე გარდაიცვალა.
შემთხვევა სოფელ ტიბაანი-ჯუგაანის დამაკავშირებელ საავტომობილო გზაზე წუხელ მოხდა.
პოლიციამ მკვლელობის ფაქტზე ერთი პირი დააკავა. შინაგან საქმეთა სამინისტროს ინფორმაციით, დაკავებულს ბრალად ედება ოჯახის წევრის ჯანმრთელობის განზრახ მძიმე დაზიანება, რამაც სიცოცხლის მოსპობა გამოიწვია.
„გამოძიებით დადგინდა, რომ ალკოჰოლის ზემოქმედების ქვეშ მყოფმა ბრალდებულმა მამაკაცმა სიღნაღში, ურთიერთშელაპარაკების ნიადაგზე, თავის დას – 1988 წელს დაბადებულ მ.ა.-ს ფიზიკური დაზიანება მიაყენა, რის შედეგადაც ქალი ადგილზე გარდაიცვალა. სამართალდამცველებმა დანაშაულში ბრალდებული ზ.ა. ცხელ კვალზე დააკავეს“, – აცხადებენ შსს-ში.
ოჯახის წევრის მიმართ ჩადენილ ჯანმრთელობის განზრახ მძიმე დაზიანების ფაქტზე გამოძიება საქართველოს სისხლის სამართლის კოდექსის 11 პრიმა-117-ე მუხლის მე-4 ნაწილით მიმდინარეობს.
დანაშაული 10-დან 14 წლამდე თავისუფლების აღკვეთას ითვალისწინებს.