უკრაინის პრეზიდენტის, ვოლოდიმირ ზელენსკის განცხადებით, მას არ შეუძლია 100%-იანი სიზუსტით იმის თქმა, თუ ვისი რაკეტა დაეცა პოლონეთის ტერიტორიაზე 15 ნოემბერს. ამის შესახებ მან Bloomberg-ის ეკონომიკურ ფორუმზე სიტყვის გამოსვლისას განაცხადა.
„არ ვიცი, რა მოხდა ამჯერად, 100%-იანი სიზუსტით არ ვიცით, მაგრამ, ვფიქრობ, რომ არც მსოფლიომ იცის 100%-იანი სიზუსტით. დარწმუნებული ვარ, რომ იყო რუსული რაკეტა და რომ ჩვენ გამოვიყენეთ საჰაერო თავდაცვის სისტემეის რაკეტები… უნდა ვიყოთ სამართლიანები, ვიდრე გამოძიება არ დასრულდება, ვერ ვიტყვით, როგორი რა ტიპის იყო რაკეტა, რომლის ნამსხვრევები დაეცა პოლონეთის ტერიტორიაზე“, – განაცხადა ზელენსკიმ.
მანამდე ზელენსკი პოლონეთში მომხდარ ინციდენტზე პასუხისმგებლობას რუსეთს აკისრებდა. „ეჭვი არ მეპარება იმაში, რომ ეს ჩვენი რაკეტა არ ყოფილა“, – განაცხადა ზელენსკიმ 16 ნოემბერს.
აფეთქება 15 ნოემბერს, გვიან ღამით უკრაინის საზღვრის სიახლოვეს მდებარე სოფელ პჟევოდოვოში, მარცვლეულის საშრობი ქარხნის ტერიტორიაზე მოხდა, რასაც 2 ადამიანი ემსხვერპლა. 16 ნოემბერს ნატოს გენერალურმა მდივანმა, იენს სტოლტენბერგმა განაცხადა, რომ წინასწარი მონაცემებით, პოლონეთში მომხდარი ინციდენტი, სავარაუდოდ, უკრაინის საჰაერო თავდაცვის სისტემის რაკეტით იყო გამოწვეული.