„ნაციონალური მოძრაობის“ თავმჯდომარე ნიკა მელია თანაპარტიელი ლევან ხაბეიშვილის მიერ ექსპრეზიდენტ მიხეილ სააკაშვილის მხარდამჭერი აქციის დაანონსებას გამოეხმაურა.
მისი თქმით, კლინიკა „ვივამედის“ ტერიტორია აქციის გასამართად შესაბამისი არ არის, ამიტომ აღნიშნულ ინიციატივაზე სააკაშვილის რეაქცია არ გაჰკვირვებია.
„4-5 თვის განმავლობაში თავიდან ბოლომდე ჩვენი ძალისხმევა, ოჯახის ძალისხმევა, თავად მიხეილ სააკაშვილის ძალისხმევა მიმართულია ჰუმანიტარულ საკითხებზე და არა პოლიტიკურზე. „ვივამედის“ ტერიტორიაზე ნებისმიერი საპროტესტო აქციის ჩატარება არაგონივრული იქნება. ერთია, რომ გულშემატკივარი მივიდეს ტერიტორიაზე, მაგრამ სხვა საკითხია, როცა აქცია იგეგმება. ამიტომ, მე საერთოდაც არ მიკვირს, რომ მიხეილ სააკაშვილს ასეთი რეაქცია ჰქონდა“, – განაცხადა მელიამ „ტვ პირველის“ ეთერში.
ცნობისთვის, „ნაციონალური მოძრაობის“ თავმჯდომარეობის კანდიდატმა, ლევან ხაბეიშვილმა 3 დეკემბერს საქართველოს მესამე პრეზიდენტის საზღვარგარეთ გადასაყვანად აქცია დააანონსა.
მოგვიანებით, ხაბეიშვილის ინიციატივას „ნაციონალური მოძრაობის“ წევრი, ეკა ხერხეულიძე გამოეხმაურა, რომელმაც აღნიშნა, რომ სააკაშვილი აქციის გამართვაზე წინააღმდეგია და სურს, რომ პოლიტიკური ინტერესებიდან იყოს დისტანცირებული.