“უკრაინის, მოლდოვასა და საქართველოს მომავალი ევროკავშირშია – საბჭო აღიარებს რეფორმების პროცესში საქართველოს მიერ გადადგმულ ნაბიჯებს”

ევროკავშირის საბჭომ გაფართოებისა და სტაბილიზაციისა და ასოცირების პროცესის შესახებ დასკვნები დაამტკიცა, რომელშიც საქართველოზეცაა საუბარი.

დასკვნა შეფასებას აძლევს არსებულ სიტუაციას ევროკავშირის თითოეულ კანდიდატ და პარტნიორ სახელმწიფოში, ადგენს სახელმძღვანელო მითითებებს რეფორმების პრიორიტეტებთან დაკავშირებით და კიდევ ერთხელ ადასტურებს ევროკავშირის საბჭოს ერთგულებას ევროკავშირის გაფართოების პოლიტიკის მიმართ.

დოკუმენტში ხაზგასმით აღნიშნულია, რომ უკრაინის, მოლდოვასა და საქართველოს და მათი მოქალაქეების მომავალი ევროკავშირშია.

ევროკავშირის საბჭო ასევე აღიარებს საქართველოს მიერ გადადგმულ მნიშვნელოვან ნაბიჯებს რეფორმების პროცესში.

„ევროკავშირის საბჭო მოუწოდებს საქართველოს, გააგრძელოს რეფორმების გზა და სრულად გაითვალისწინოს ევროკომისიის მოსაზრებაში მითითებული პრიორიტეტები წევრობის განაცხადთან დაკავშირებით. ევროკავშირის საბჭო ყურადღებას ამახვილებს საქართველოსთან ევროკავშირის სექტორული თანამშრომლობის შემდგომ გაღრმავებაზე, ევროკავშირი-საქართველოს ღრმა და ყოვლისმომცველი თავისუფალი ვაჭრობის შეთანხმების გაძლიერებული იმპლემენტაციის საფუძველზე“, – აღნიშნულია დოკუმენტში.

დასკვნაში ასევე ნათქვამია, რომ ევროკავშირის საბჭომ აღიარა საქართველოს ევროპული პერსპექტივა და დაადასტურა მზადყოფნა, მიანიჭოს მას კანდიდატის სტატუსი, როგორც კი ევროკომისიის მიერ წარმოდგენილი პრიორიტეტები იქნება შესრულებული.