ვიდრე ქვეყანა არის ოკუპანტი, ის არის მტერიც, რად უნდა ამას შეკითხვის დასმა? საბავშვო ბაღს თამაშობთ, შემდეგი კითხვა რა გაქვთ, გითხრათ? – „აბა, შეაგინეო” იტყვით, – ასე უპასუხა თავდაცვის მინისტრმა, ჯუანშერ ბურჭულაძემ ჟურნალისტების კითხვას, მტერია თუ არა რუსეთი.
„გავეცი ამასაც პასუხი და თქვენ ისევ თქვენი ნარატივი გააგრძელეთ. რამდენჯერ უნდა გაგცეთ. დაანებეთ თავი საბავშვო ბაღობანას. თქვენ ფიქრობთ, მე მეშინია – ვთქვა, რომ რუსეთი მტერია? ვთქვი, რომ ოკუპანტია, მე მეტი ვთქვი და განვმარტე ჩემი პასუხიც. ოკუპანტი არის მტერიც. თქვენ გგონიათ, თქვენ ხართ პატრიოტები და საქართველოში არის პირთა წრე, თან დიდი, რომელიც ამას ასე არ აღიარებს? სანამ ქვეყანა არის ოკუპანტი, ის არის მტერიც, რად უნდა ამას შეკითხვის დასმა? ვინ ვერ პასუხობს?” – განაცხადა ბურჭულაძემ.
ჟურნალისტის რეპლიკაზე, რომ ამას ირაკლი კობახიძე არ პასუხობს და ამიტომ გახდა კითხვა აქტუალური, ბურჭულაძემ თქვა, რომ ჟურნალისტები “საბავშვო ბაღს” თამაშობენ.
“შემდეგი კითხვა რა გაქვთ გითხრათ, მაგაზე რომ გიპასუხოთ? – “აბა, შეაგინეო” იტყვით და ეს არის კრიმინალური აზროვნების ნაწილი”, – დასძინა მინისტრმა.