„99 % პრეტენზიისა, რომ აბონენტებს ბევრი გადასახადი მიუვიდათ, არ დასტურდება“, – ამის შესახებ გაზგამანაწილებელი კომპანია „თბილისი ენერჯის“ ტექნიკური დირექტორის მოადგილემ, გიორგი ლეფსვერიძემ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
მისი თქმით, აბონენტებს ის გადასახადი მისდით, რა საფასურის გაზსაც მოიხმარენ.
„ზამთარში გაზის მოხმარება იმატებს. ჩვენი ზოგიერთი აბონენტი, ერთეულები მოგვამართავენ, რომ ბევრი გადასახადი მიუვიდათ. ამას მრავლობითი ხასიათი არ აქვს. მინდა, გითხრათ, რომ ჩვენ თანამშრომლობისთვის მზად ვართ, თითოეულ აბონენტთან გახსნილები ვართ. მინდა, გითხრათ სტატისტიკა: 99 % პრეტენზიისა, რომ ბევრი გადასახადი მიუვიდათ, არ დასტურდება. აბონენტებს ის გადასახადი მიუვიდათ, რა საფასურის გაზიც მოიხმარეს. შემოწმების შედეგად დასტურდება, რომ აბონენტმა იმდენი ლარის გაზი მოიხმარა, რამდენიც ჩვენ მიერ გაგზავნილი ქვითრით მიუვიდათ“, – განაცხადა ლეფსვერიძემ.
მისივე თქმით, გაზის ხარისხი დღეს მოცემულ სტანდარტებს და ნორმებს შეესაბამება.
„რაც შეეხება გაზის ხარისხს – ის საქართველოში მოწმდება. ხარისხს საქართველოს გაზის ტარნსპორტირებაში არსებული ISO სერტიფიცირებული სპეციალური ლაბორატორია ამოწმებს. შედეგები „საქართველოს გაზის ტრანსპორტირების კომპანიის“ ვერბგვერდზე ქვეყნდება. ნებისმიერ დაინტერესებულ ადამიანს შეუძლია, ამ ვებგვერდზე შევიდეს და ნახოს, თუ რა ხარისხის გაზი მოეწოდება ჩვენს ქვეყანას. საქართველოში ბუნებრივი აირი იმპორტირებულია და მინდა, გითხრათ, რომ გაზის ხარისხი დღეს მოცემულ სტანდარტებს და ნორმებს შეესაბამება, იმ ხარისხის არის, რა ხარისხისაც მთელ მსოფლიოში სტანდარტითაა მიღებული“, – განაცხადა ლეფსვერიძემ.