გიორგი ხოჯევანიშვილი საპარლამენტო მანდატსა და გიორგი გახარიას პარტიას „საქართველოსთვის“ ტოვებს. ამის შესახებ ხოჯევანიშვილი Facebook-ზე წერს. ამ გადაწყვეტილების მიზეზად იმას ასახელებს, რომ წინასაარჩევნო დაპირებების შესრულების შესაძლებლობა არ ეძლევა.
„მეგობრებო, მინდა გაცნობოთ, რომ ვტოვებ პარლამენტის წევრის მანდატს, ვწყვეტ პოლიტიკურ საქმიანობას და შესაბამისად, ვტოვებ პარტია „საქართველოსთვის“ რიგებს. ამ გადაწყვეტილების მიზეზი არის ერთადერთი გარემოება: მაღალი პასუხისმგებლობის განცდა, რომელიც მაქვს ჩემი ამომრჩევლის წინაშე, როგორც გორისა და კასპის მაჟორიტარ დეპუტატს. სამწუხაროდ, დღევანდელი პოლიტიკური რეალობის გათვალისწინებით, არ მეძლევა საშუალება, ეფექტურად მოვახდინო ჩემი წინასაარჩევნო დაპირებების შესრულება, რაც ჩემი პირდაპირი მოვალეობაა. ჩემთვის, როგორც სახელმწიფო მოხელისთვის, ყოველთვის პრიორიტეტი იყო ხალხის ინტერესების მსახურება და არასდროს წარმოადგენდა რაიმე თანამდებობა თვითმიზანს…
აქვე გარკვევით მინდა განვმარტო, რომ არ ვგეგმავ არანაირ პოლიტიკურ აქტივობას და ვაპირებ საქმიანობა გავაგრძელო კერძო სექტორში“, – წერს ხოჯევანიშვილი.
მან ამომრჩევლებს, კოლეგებსა და თანაგუნდელებს მადლობა გადაუხადა.