საზოგადოებრივ ტრანსპორტში ცოლის მკვლელობის საქმის არსებითი განხილვა საქალაქო სასამართლოში უკვე დასრულდა. დასკვნითი სიტყვა თქვეს დაცვისა და ბრალდების მხარეებმა. საბოლოო სიტვით ბრალდებული კი უკვე 17 თებერვალს ისარგებლებს, რის შემდეგაც მოსამართლე საქმეზე განაჩენს გამოიტანს.
დღევანდელ პროცესზე დაცვის მხარე ამტკიცებდა, რომ დანაშაულის ჩადენის მომენტში ბრლადებული შეურაცხადი იყო. რაც შეეხება ბრალდების მხარეს, პროკურორმა მოსამართლეს მიმართა, რომ ბრალდებულს დანაშაულის სიმძიმიდან გამომდინარე უვადოდ თავისუფლების აღკვეთა უნდა მიესაჯოს. გარდაცვლილის დედა მოითხოვს, ყოფილ სიძეს მაქსიმალური სასჯელი შეუფარდონ.
„მოვითხოვ, რომ მას აუცილებლად მიეზღოს ის, რაც საჭიროა. როდესაც ჩემი შვილი მოკლა, ჩემ შვილს ედო ბავშვის ინსულინი ჩანთაში. რატომ გაახსენდა თუ შერაცხადი იყო [ბრალდებულს], რომ მოეხსნა მიცვალებულისთვის ზურგჩანთა, გაეჩერებინა ვიღაც უცნობი, სწორად ეთქვა მისთვის მისამართი, სადაც ინსულინი უნდა მიეტანათ. ხუთი ბავშის წინ მოხდა ეს ყველაფერი. ბავშვები დღემდე ფსიქოლოგებთან დაგვყავს“, – აცხადებს ხათუნა ნაჭყებია.
2022 წლის 21 მაისს 31 წლის ქალი ქმარმა ავტობუსში, მცირეწლოვანი შვილების თვალწინ მოკლა. სოფო კვარაცხელიას სასიკვდილო ჭრილობები დანით ჰქონდა მიყენებული. ის ადგილზე გარდაიცვალა. როინ მებონიას ბრალად ედება ოჯახის წევრის მიმართ განსაკუთრებული სისასტიკით ჩადენილი განზრახ მკვლელობა. დანაშაული16-დან 20-წლამდე ან უვადო პატიმრობას ითვალისწინებს.