„კონფრონტაცია, საზოგადოების გახლეჩა, ფრონტის ხაზი სააკაშვილის თემაზე გადის, სააკაშვილის გაშვებამ, მისმა ამნისტირებამ კი, შეიძლება გარკვეული უკმაყოფილების ტალღა გამოიწვიოს, მაგრამ ზუსტად ეს არის საზოგადოების შერიგების ფორმულა, იმიტომ, რომ თუ ეს ადამიანი ქართულ პოლიტიკას თავს დაანებებს და ცოტა ხანს მაინც შეგვეშვება, სახელმწიფო ნორმალური განვითარების გზას დაუბრუნდება“, – ასე გამოეხმაურა პოლიტოლოგი გია ხუხაშვილი „პალიტრანიუსის“ გადაცემაში პრეზიდენტ სალომე ზურაბიშვილის განცხადებას, რომ „მის მიერ სააკაშვილის შეწყალება კიდევ უფრო გააღრმავებდა ქვეყანაში არსებულ პოლარიზაციას“.
როგორც გია ხუხაშვილი აღნიშნავს, სალომე ზურაბიშვილის ეს არგუმენტი „არათუ არადამაჯერებელი, არამედ უკუღმა არგუმენტია“.
მისივე თქმით, „პრეზიდენტს გარკვეული წითელი ხაზები აქვს“.
„სალომე ზურაბიშვილმა თვითონ ხომ კარგად იცის, რომ საქართველოში მას პრეზიდენტად არავინ აირჩევდა, ფაქტობრივად, მისი არჩევა იყო პირადად ბიძინა ივანიშვილის კაპრიზი.
პირდაპირ, რომ ვთქვათ ბიძინა ივანიშვილმა დანიშნა. სალომე ზურაბიშვილი არავის აურჩევია. ბიძინა ივანიშვილმა აიღო სალომე ზურაბიშვილი, მისი დიდი ხვეწნის შემდეგ, სხვათა შორის, სალომე ზურაბიშვილი პრეზიდენტობას ითხოვდა ჯერ კიდევ მაშინ, როცა გიორგი მარგველაშვილს ვაყენებდით კანდიდატად.
მათ შორის, მეც მთხოვდა, რომ ამ საქმეში დავხმარებოდი. ის „ჩალიჩობდა“ მაშინაც, რომ პრეზიდენტობის კანდიდატი გამხდარიყო..
ბიძინას არ უნდოდა, რბილად რომ ვთქვათ, მაინც და მაინც არ ეხატებოდა გულზე.
ამ ქალბატონმა ეს ხომ იცის, შესაბამისად „ფეხებს დააბაკუნებს, გაებუტება, მაგრამ ეს ვალდებულება მას კისერზე აწევს. შესაბამისად, ასეთი ნიშა იპოვა, რომ ილაპარაკოს ბევრი და არ გააკეთოს არაფერი“, – განაცხადა გია ხუხაშვილმა.