საქართველო ფრისტაილის, სნოუბორდისა და ფრისკის მსოფლიო ჩემპიონატს ისტორიაში პირველად მასპინძლობს. „იმედის კვირა“ დაინტერესდა, როგორ მიმდინარეობდა საორგანიზაციო სამუშაოები და როგორ გაიხსნა ტურნირი, რომელშიც 42 ქვეყნის 700-მდე სპორტსმენი მონაწილეობს.
ბაკურიანის განვითარებასა და ტურნირის ორგანიზებაში სახელმწიფომ 270 მლნ ლარზე მეტი ჩადო. ეკონომიკისა და მდგრადი განვითარების მინისტრი ლევან დავითაშვილი ჩემპიონატის ეკონომიკურ სარგებელზე საუბრობს.
„ვხედავთ, რომ სპორტსმენებთან ერთად უამრავი გულშემატკივარია ბაკურიანში ჩამოსული. სპორტული ღონისძიებები თავისთავად, ძალიან ბევრ სიკეთეს იძლევა ქვეყნებისთვის. საქართველო პირველად ხდება იმ ოჯახის წევრი, სადაც მაღალი დონის საერთაშორისო სამთო-სათხილამურო შეჯიბრებებს ატარებენ. ჩვენ გვაქვს ახალი ტრასები, ახალი საბაგირო გზები, ხელოვნური გათოვლიანების სისტემა, ისე რომ კურორტის მასპინძლობის ხანგრძლივობა უფრო დიდი იქნება. ამავე დროს, ნაკლებად ვიქნებით დამოკიდებულები გარემო პირობებსა და ამინდზე“, – მიიჩნევს დავითაშვილი.