აშშ-ის პრეზიდენტი ჯო ბაიდენი ვარშავაში მოლდოვის პრეზიდენტს, მაია სანდუს შეხვდა.
მოლდოვური მედიის ცნობით, პრეზიდენტებმა მოლდოვისთვის უკრაინის ომის შედეგები განიხილეს.
მაია სანდუმ აშშ-ის ლიდერს მიაწოდა ინფორმაცია მოლდოვის ხელისუფლების ძალისხმევის შესახებ, ქვეყანაში მშვიდობისა და საზოგადოებრივი წესრიგის შესანარჩუნებლად. მან ასევე ბაიდენი მოლდოვაში მიიწვია.
„პრეზიდენტ ბაიდენს გადავეცი, რომ მოლდოველებს სურთ, დარჩნენ თავისუფალი მსოფლიოს ნაწილად, იცხოვრონ უსაფრთხოდ და მიაღწიონ თავიანთ ოცნებას, რაც ევროკავშირში გაწევრიანებას გულისხმობს. მადლობა გადავუხადე მას მნიშვნელოვანი მხარდაჭერისთვის, რომელსაც აშშ ახორციელებს ჩვენი ქვეყნის ეკონომიკური განვითარებისა და დემოკრატიული ცვლილებებისთვის“, – განაცხადა მაია სანდუმ.
მოლდოვის პრეზიდენტმა ასევე მადლობა გადაუხადა ჯო ბაიდენს იმ დახმარებისთვის, რომელიც აშშ-ის მთავრობამ მოლდოვას ბოლო ერთი წლის განმავლობაში ენერგეტიკულ კრიზისთან გასამკლავებლად აღმოუჩინა.
„ამან საშუალება მოგვცა, გადაგვეხადა კომპენსაცია მცირე შემოსავლის მქონე მოქალაქეებისთვის, რათა ისინი უფრო ადვილად გაუმკლავდნენ ენერგომატარებლებზე მზარდ ფასებს. ჩვენ კვლავ გვაქვს აშშ-ის მთავრობის მხარდაჭერის იმედი ჩვენს ძალისხმევაში, მოვახდინოთ ენერგიის წყაროების დივერსიფიცირება და გავაძლიეროთ ენერგეტიკული უსაფრთხოება“, – აღნიშნა სანდუმ.
ჯო ბაიდენი მოლდოვაში 2011 წელს ვიცე-პრეზიდენტის რანგში იმყოფებოდა.