დღეს 1 წელი გავიდა მას შემდეგ, რაც უკრაინაში ეს დამანგრეველი ომი დაიწყო. ყოვლად გაუმართლებელია ის ომი, რომელიც წამოიწყო რუსეთმა, – ამის შესახებ პრემიერ-მინისტრმა, ირაკლი ღარიბაშვილმა ჟურნალისტებთან განაცხადა, რომელიც თურქეთში ვიზიტით იმყოფება.
„ომის დაწყების პირველივე დღეებიდან ქართველი ხალხი გვერდით უდგას უკრაინელ ხალხს. ჩვენ ათასობით უკრაინელს ვუმასპინძლეთ საქართველოში, მაქსიმალური მხარდაჭერა აღმოვუჩინეთ მათ. ასევე ვიყავით თანასპონსორი გაეროს რეზოლუციის. ასევე ჩემი დავალებით საგარეო საქმეთა მინისტრი ახლა იმყოფება ნიუ-იორკში. ჩვენ კიდევ ერთხელ გამოვხატეთ ჩვენი სოლიდარობა, ჩვენი პოზიცია დავაფიქსირეთ, რომ მხარს ვუჭერთ უკრაინის ტერიტორიულ მთლიანობასა და სუვერენიტეტს. გვინდა, რომ ეს ომი რაც შეიძლება მალე დასრულდეს და აღდგეს მშვიდობა – ეს არის ჩვენი მთავარი გზავნილი. ჩვენ 400-ზე მეტ რეზოლუციას, განცხადებას მივუერთდით ამ ბოლო 1 წლის განმავლობაში. ყველა პლატფორმაზე ჩვენ მხარდაჭერა გამოვუცხადეთ უკრაინელ ხალხს“, – განაცხადა პრემიერმა.