ევროკავშირმა რუსეთის წინააღმდეგ სანქციების მეათე პაკეტი შეათანახმა. ინფორმაციას ამის შესახებ ევროკავშირის საბჭოში შვედეთის წარმომადგენლობა ავრცელებს.
სანქციები ითვალისწინებს მკაცრ შეზღუდვებს რუსეთში ორმაგი დანიშნულები პროდუქციისა და ტექნოლოგიების ექსპორტზე, მიზნობრივ შემზღუდავ ზომებს ფიზიკური და იურიდიული პირების წინააღმდეგ, რომლებიც მხარს უჭერენ ომს, ავრცელებენ პროპაგანდას ან აწვდიან რუსეთს უპილოტო საფრენ აპარატებს.
„ერთობლივი ძალისხმევით ევროკავშირის წევრმა ქვეყნებმა მიიღეს ყველაზე მძლავრი და ფართო სანქციები მთელი ისტორიის განმავლობაში, რათა დაეხმარონ უკრაინას, ომში გაიმარჯვოს. ევროკავშირი ერთიანია უკრაინასა და უკრაინელ ხალხთან. გავაგრძელებთ უკრაინის მხარდაჭერას იქამდე, ვიდრე ეს საჭირო იქნება“< – აღნიშნულია შვედეთის წარმომადგენლობის განცხადებაში.
ახლა სანქციების პაკეტს წერილობით უნდა დაუჭიროს მხარი ევროკავშირის საბჭომ. სანქციები ევროკავშირის ოფიციალურ საბჭოში გამოქვეყნების შემდეგ ამოქმედდება.