“ჩინეთისთვის მძიმე შედეგები დადგება, თუ რუსეთს დახმარებას გაუწევს”

უკრაინაში ვიზიტით მყოფმა აშშ-ის ხაზინის მდივანმა, ჯანეტ იელენმა განაცხადა, რომ ჩინეთისთვის მძიმე შედეგები დადგება, თუ რუსეთს დახმარებას გაუწევს.

„ჩვენ ძალიან მკაფიოდ განვაცხადეთ, რომ არ მოვითმენთ რომელიმე ქვეყნის მიერ ჩვენ მიერ დაწესებული სანქციების სისტემატიურ დარღვევას. ჩვენ ძალიან მკაფიოდ ვისაუბრეთ ჩინეთის მთავრობასთან და ჩინურ ფირმებსა და ფინანსურ ინსტიტუტებთან და მათ ვუთხარით, რომ ამ სანქციების დარღვევის შედეგები ძალიან მძიმე იქნება“, – აღნიშნა აშშ-ის ხაზინის მდივანმა.

22 თებერვალს, პენტაგონის პრეს-მდივნის მოადგილემ, საბრინა სინგჰმა განაცხადა, რომ ჩინეთისთვის შედეგები დადგება, თუ ის რუსეთს ლეტალურ სამხედრო დახმარებას გაუწევს.

20 თებერვალს, საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა, რომ ევროკავშირისთვის წითელი ხაზი იქნება, თუ ჩინეთი რუსეთს იარაღს გაუგზავნის.

გასულ კვირას, აშშ-ის სახელმწიფო მდივანმა, ენტონი ბლინკენმა განაცხადა, რომ აშშ ღრმად შეშფოთებულია, რომ ჩინეთი რუსეთისთვის ლეტალური დახმარების გაწევას პოტენციურად განიხილავს.