ოლიმპიადაზე ტერორისტული სახელმწიფოს წარმომადგენლების ადგილი არ არის, – განაცხადა უკრაინის პრეზიდენტმა, ვოლოდიმირ ზელენსკიმ.
„ჩვენ ვაგრძელებთ დიპლომატიურ მარათონს, რათა კრემლმა არ გამოიყენოს მსოფლიო სპორტი და ოლიმპიური მოძრაობა თავისი პროპაგანდისთვის. ოლიმპიურ თამაშებსა და საერთაშორისო ტურნირებზე ტერორისტული სახელმწიფოს წარმომადგენლების ადგილი არ არის“, – აღნიშნა უკრაინის პრეზიდენტმა.
ვოლოდიმირ ზელენსკის თქმით, უკრაინამ შესაბამისი წერილებით უკვე მიმართა მსხვილ საერთაშორისო კომპანიებს, რომლებიც ყველაზე მეტად უჭერენ მხარს საერთაშორისო ოლიმპიურ კომიტეტს.
11 თებერვალს, 35 ქვეყნის მინისტრები შეთანხმდნენ, რომ მიიღებენ ზომებს, რათა არ დაუშვან 2024 წლის ოლიმპიურ თამაშებში რუსი და ბელარუსი სპორტსმენების მონაწილეობა.
18 თებერვალს, ევროპარლამენტმა მოუწოდა ევროკავშირის ქვეყნებს, ზეწოლა მოახდინონ საერთაშორისო ოლიმპიურ კომიტეტზე, რათა რუს და ბელარუს სპორტსმენებს პარიზის ოლიმპიადაზე გამოსვლა აეკრძალოს.