„ატალანტას“ კარში ხვიჩა კვარაცხელიას გატანილი გენიალური გოლი ორი დღეა იტალიური (და არა მარტო) მედიის მთავარი თემაა – ცნობილი გამოცემები და ფეხბურთის ლეგენდები კომენტარებს აქვეყნებენ.
corriere – ქართული გოლი მარადონას სტილში
„კვარაცხელიას „ატალანტასთან“ გატანილმა გოლმა, ბევრს მარადონას გოლი გაახსენა. ხვიჩამ ლამაზი ცრუ მოძრაობებით ბერგამოელთა მცველები ჩამოიშორა და „სტადიო მარადონაზე“ მყოფი გულშემატკივრები (მათ შორის ქართველები, რომლებიც მას ყოველ კვირას თამაშებზე დაჰყვებიან) აღაფრთოვანა“.
FE-NO-ME-NO!
„ნაპოლის“ გამარჯვებას ფეისბუქზე Corriere dello Sport-ის ჟურნალისტი ანტონიო ჯორდანო გამოეხმაურა.
„ის ფენომენია! ხვიჩა გაურბის ყველა წესს და ყველას აღაფრთოვანებს თავისი შესანიშნავი თამაშით. კვარა ახალი გმირია, ვინც ყველას აიძულებს, რომ შეიყვაროს, მიუხედავად იმისა, ვისი ქომაგია. ის 22 წლის ასაკში, სოციალური მედიის საშუალებით, აქტიურობს თავისი ქვეყნის მომავლის საკითხების განსაზღვრაში. ამავე დროს, ძალიან კარგი ადამიანია, რომელმაც ნეაპოლი მოხიბლა და ფეხბურთის გულშემატკივრები შოკში ჩააგდო. კვარა არის FE-NO-ME-NO!“.
ფაბრიციო რომანო – კვარაცხელია მხოლოდ 10 მილიონად შეიძინეს
ხვიჩა კვარაცხელიამ მორიგი ფანტასტიკური გოლი გაიტანა. სერია A-ს 22 მატჩში 11 გოლი და 11 საგოლე მოქმედება (9 პასი და 2 მოპოვებული პენალტი), ამას დაუმატეთ ჩემპიონთა ლიგაში 2 გოლი და 4 საგოლე გადაცემა. შეგახსენებთ, „ნაპოლიმ“ კვარაცხელიას შესაძენად მხოლოდ 10 მილიონი ევრო დახარჯა.