უნგრეთმა, მარცვლეულთან ერთად, უკრაინიდან თაფლისა და ზოგიერთი ხორცპროდუქტის იმპორტიც აკრძალა. შეზღუდვა 30 ივნისიდან ამოქმედდება, – ამის შესახებ ინფორმაციას „გარდიანი“ ავრცელებს.
როგორც უნგრეთის პრემიერ-მინისტრის ადმინისტრაციის უფროსმა განაცხადა, სულ უნგრეთმა აკრძალა 25 უკრაინული საქონლის იმპორტი, მათ შორის არის მარცვლეული, მზესუმზირის თესლი, ფქვილი, ზეთი, თაფლი და ზოგიერთი ხორცპროდუქტი. ამასთან, უნგრეთის სოფლის მეურნეობის მინისტრმა განაცხადა, რომ უნგრეთი დაუშვებს უკრაინული მარცვლეულის ტრანზიტს და უზრუნველყოფს, რომ ეს კონტროლირებადი პროცესი იყოს.
შეგახსენებთ, ბოლო დღეებში ბულგარეთმა, პოლონეთმა, უნგრეთმა და სლოვაკეთმა უკრაინული სასოფლო-სამეურნეო საქონლის იმპორტი აკრძალეს, ხოლო რუმინეთში ანალოგიური აკრძალვის დაწესებას მოითხოვენ. ამის მიზეზი ის არის, რომ უკრაინული იაფი პროდუქციის შეტანა ევროკავშირის ბაზარზე ადგილობრივ ფერმერებს აზარალებს. მოგვიანებით ცნობილი გახდა, რომ პოლონეთი დათანხმდა უკრაინული პროდუქციის ტრანზიტით გატარებას, თუმცა გარკვეული პირობებით.