ბრიტანული დაზვერვის ცნობით, რუსეთის ხელისუფლებამ 9 მაისს “უკვდავი პოლკის” მსვლელობა, დიდი ალბათობით, იმ მიზეზით გააუქმა, რომ თავიდან აიცილოს უკრაინის ომში დანაკარგების მასშტაბის ხაზგასმა.
2023 წლის 18 აპრილს რუსეთის სახელმწიფო მედიამ გამოაცხადა, რომ უკვდავი პოლკის წლევანდელი მარში გაუქმდა. ოფიციალურ მიზეზად “უსაფრთხოების ზომები” დასახელდა.
”ხელისუფლება დიდი ალბათობით შეშფოთებულია, რომ მონაწილეების რაოდენობა ხაზს გაუსვამდა რუსეთის ბოლოდროინდელი დანაკარგების მასშტაბებს”, – ამბობენ დიდი ბრიტანეთის თავდაცვის სამინისტროში.
ბრიტანული დაზვერვის თანახმად, რუსული სახელმწიფო ცდილობს შეინარჩუნოს თანმიმდევრულობა იმ ძირითად ნარატივში, რომელსაც ის იყენებს უკრაინის ომის გასამართლებლად: რომ შეჭრა მეორე მსოფლიო ომის საბჭოთა გამოცდილების ანალოგია.
ამასთან, “ვაგნერის დაჯგუფების” ლიდერმა ევგენი პრიგოჟინმა საჯაროდ გამოთქვა ეჭვი იმის თაობაზე – არიან თუ არა „ნაცისტები“ უკრაინაში, რაც ეწინააღმდეგება ომის რუსულ საინფორმაციო კამპანიას.
„ხელისუფლება აგრძელებს მცდელობებს გააერთიანოს რუსული საზოგადოება 1940-იანი წლების მითების გარშემო“, – ნათქვამია ბრიტანეთის დაზვერვის ცნობებში.