თამარ ბაჩალიაშვილის ოჯახმა და ადვოკატებმა საქართველოს გენერალურ პროკურატურაში ხელახალი გამოძიების დაწყების მოთხოვნით განცხადება შეიტანეს. მათი თქმით, საქმეში ახალი გარემოებებია, რაც ხელახალი გამოძიების დაწყების საფუძველს იძლევა.
„ვითხოვთ, კვალიფიკაცია შეეცვალოს ჩემი შვილის საქმეს და დაიწყონ თავიდან გამოძიება მკვლელობის მუხლით. ეს [ყოფილი გამომძიებლის განცხადება] არის პირდაპირი მტკიცებულება, ისევ მათი უწყების თანამშრომლის [განცხადება], რომელმაც უკეთ იცის რა ხდება ზოგადად ამ სისტემაში“, – აცხადებს ბაჩალიაშვილის დედა თეონა თამაზაშვილი.
თამარ ბაჩალიაშვილის საქმეზე მტკიცებულებების შესაძლო ფალსიფიკაციის ფაქტზე, პროკურატურამ გამოძიება დაიწყო. მოკვლევის საფუძველი, ბაჩალიაშვილის საქმის ერთ-ერთი დეტექტივ- გამომძიებლის სატელევიზიო ინტერვიუ გახდა. საუბარია სერგო შუბითიძეზე, რომელმაც პროკურატურის ინფორმაციით, გამოძიების ფარგლებში სულ სამი ადამიანი გამოჰკითხა.
პროკურატურის მიერ გავრცელებულ განცხადებაში ნათქვამია, რომ მას არ ჩაუტარებია ისეთი საგამოძიებო მოქმედებები, რომლის შედეგიც გავლენას მოახდენდა გამოძიებით დადგენილ გარემოებებზე. სატელევიზიო ინტერვიუს შემდეგ, სერგო შუბითიძე გენერალურ პროკურატურაში გამოკითხვაზე დაიბარეს, თუმცა მან ჩვენება არ მისცა და ითხოვს, მოსამართლემ გამოჰკითხოს.
პროკურატურამ თამარ ბაჩალიაშვილის გარდაცვალების საქმეზე გამოძიება 2020 წლის დეკემბერში შეწყვიტა. პროკურატურაში გამართულ ბრიფინგზე პროკურორმა ამირან გულუაშვილმა განაცხადა, საქმეზე გამოძიება დასრულდა და დადგინდა, რომ თამარ ბაჩალიაშვილმა სიცოცხლე თვითმკვლელობით დაასრულა.