საქართველოს პრემიერ-მინისტრი ბუდაპეშტშია – ირაკლი ღარიბაშვილი კონსერვატიული პოლიტიკური მოქმედების ყოველწლიურ კონფერენციაზე დღეს სიტყვით გამოვა. ასევე მოწვეულნი არიან სხვადასხვა ქვეყნის მაღალი დონის წარმომადგენლები.
„ღმერთი, სამშობლო, ოჯახი“ – ეს კონსერვატიული პოლიტიკური სამოქმედო კონფერენციის წლევანდელი დევიზია. კონფერენცია იმ პოლიტიკოსთა უმნიშვნელოვანეს კონსერვატიულ შეკრებას წარმოადგენს, რომლებიც დაინტერესებულნი არიან კონსერვატიული მიდგომების მომავლით. ბუდაპეშტი კონფერენციას უკვე მეორედ მასპინძლობს. დელეგატებს ტრიბუნიდან მიმართავს უნგრეთის პრემიერი ვიქტორ ორბანი, რომელიც შემდეგ, პირისპირ ირაკლი ღარიბაშვილს შეხვდება.
როგორც ცნობილია, გასულ წელს შემდგარი შეხვედრისას, ორი ქვეყნის პრემიერმა საქართველო-უნგრეთს შორის არსებული ურთიერთობების სტრატეგიულ დონეზე აყვანის გადაწყვეტილება მიიღეს. უნგრეთში პრემიერის ვიზიტის ფარგლებში დაგეგმილია სხვა მაღალი დონის ორმხრივი შეხვედრებიც.
დელეგაციის შემადგენლობაში არიან საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი, რევაზ ჯაველიძე. კონფერენცია 2-დღიანია და ის 4-5 მაისს ჩატარდება.