პოლონეთი აშშ-სგან Apache-ის ტიპის რვა ვერტმფრენს მიიღებს, – ამის შესახებ პოლონეთის თავდაცვის მინისტრმა, მარიუშ ბლაშიაკმა ამერიკელ კოლეგასთან, ლოიდ ოსტინთან მოლაპარაკებების შემდეგ განაცხადა.
მისივე თქმით, აშშ-ის არმია პოლონეთს პირველ რვა ვერტმფრენს საკუთარი მარაგიდან მიაწვდის. პოლონელი მფრინავების წვრთნა კი რამდენიმე კვირაში დაიწყება. რაც შეეხება გადაცემის პროცესს, ვერტმფრენები, სავარაუდოდ, მომავალ წელს გაიგზავნება აღმოსავლეთ პოლონეთში.
„აშშ-ის არმია გვაწვდის ვერტმფრენებს საკუთარი რესურსებით იქმადე, ვიდრე 96 ვერტმფრენის შესყიდვის კონტრაქტს ხელს მოვაწერთ. ეს ძალიან მნიშვნელოვანი შესაძლებლობაა და მადლობას ვუხდი მინისტრ ოსტინს ამ გადაწყვეტილებისთვის“, – განაცხადა პოლონეთის თავდაცვის მინისტრმა.
პოლონეთმა ჯერ კიდევ შარშან გამოთქვა აღნიშნული ვერტმფრენების შეძენის სურვილი, თუმცა გადაცემის ზუსტი თარიღი ამ დრომდე უცნობია. შეძენის საკონტრაქტო პირობები ჯერ კონგრესმა და აშშ-ის სახელმწიფო დეპარტამენტმა უნდა დაამტკიცონ.
AH-64 Apache თავდასხმისთვის განკუთვნილი ვერტმფრენია, რომელიც აშშ-ის არმიას 1980 წლიდან ემსახურება. იგი 30 მმ-იანი ტყვიამფრქვევითაა აღჭურვილი და შექმნილია ორკაციანი ეკიპაჟისთვის.