ვანის რაიონულ სამმართველოში მიღებული ოპერატიული ინფორმაციის საფუძველზე, არასრულწლოვნების მიმართ განხორციელებული შესაძლო გარყვნილი ქმედების ფაქტზე გამოძიება პირველ მაისს დაიწყო, – ამის შესახებ საქართველოს პირველ არხს შსს-ში განუცხადეს.
მათივე ცნობით, გამოძიების ფარგლებში, პირველ მაისსვე დაიწყო საგამოძიებო მოქმედებები, მათ შორის კანონიერი წარმომადგენლის, მშობლის თანდასწრებით გამოიკითხნენ არასრულწლოვნები.
„მომდევნო დღეებში ჩატარდა ასევე არაერთი საგამოძიებო მოქმედებები, მათ შორის დამატებით გამოიკითხნენ საქმესთან შემხებლობაში მყოფი პირები, სკოლის მოსწავლეები, სკოლის პედაგოგები. ტარდება ყველა საჭირო საპროცესო და საგამოძიებო მოქმედება.
საქმეზე გამოძიება გრძელდება სსკ-141-ე მუხლის პირველი ნაწილით“,- აღნიშნავენ შსს-ში და აცხადებენ, რომ გამოძიების ფარგლებში მოხდება ყველა იმ პირის დაბარება და გამოკითხვა, ვისაც აქვს ნებისმიერი ინფორმაცია საქმესთან დაკავშირებით.
ცნობისათვის, სოციალურ ქსელში გავრცელებული ინფორმაციით, სკოლის სამარშრუტო ტაქსის მძღოლი მოსწავლეებს სიტყვიერად და ფიზიკურად ავიწროებდა. ვიდეომასალა მოსწავლეებმა გაავრცელეს.