თურქეთმა უარი თქვა აშშ-ის შეთავაზებაზე, გადაეცა უკრაინისთვის რუსეთისგან შეძენილი სარაკეტო თავდაცვის სისტემა „S-400“, – ამის შესახებ თურქეთის საგარეო საქმეთა მინისტრი, მევლუთ ჩავუშოღლუმ განაცხადა.
როგორც თურქული სააგენტო „ანადოლუ“ წერს, ჩავუშოღლუმ აღნიშნა, რომ შეერთებული შტატები სთავაზობდა თურქეთს, რუსეთისგან შეძენილ სარაკეტო სისტემაზე კონტროლი გადაეცა აშშ-სთვის, ან სხვა ქვეყნისთვის, მაგალითად უკრაინისთვის, რომელიც ცდილობს წინააღმდეგობა გაუწიოს რუსეთს.
„ამერიკის შეერთებულმა შტატებმა გვთხოვა „S-400”-ების გაგზავნა უკრაინაში და ჩვენ უარი ვუთხარით“,– განაცხადა ჩავუშოღლუმ.
ჩავუშოღლუს თქმით, ეს წინადადება თურქეთისთვის მიუღებელია, რადგან თურქეთის სუვერენიტეტის ხელყოფას ისახავს მიზნად.
შეგახსენებთ, თურქეთმა 2017 წელს, მას შემდეგ, რაც აშშ-სგან საჰაერო თავდაცვის სისტემის მოპოვების ხანგრძლივი მცდელობა უშედეგო აღმოჩნდა, ხელი მოაწერა კონტრაქტს რუსეთთან უახლესი „S-400” სარაკეტო თავდაცვის სისტემის შესაძენად.