“სტუდენტებს, რომლებიც აგრონომიის, სურსათის და ვეტერინარიის საბაკალავრო პროგრამებში სწავლობენ დაუწესდებათ სტიპენდია”

კიდევ ერთი სტიპენდია, რომელსაც მერი გასცემს, დაუწესდებათ სტუდენტებს, რომლებიც აგრონომიის, სურსათის და ვეტერინარიის საბაკალავრო პროგრამებში სწავლობენ და სემესტრის განმავლობაში გავლილ ყველა სალექციო კურსში ექნებათ არანაკლებ 95 ქულა, – განაცხადა ოზურგეთის მერმა ავთანდილ თალაკვაძემ მერიის სხდომაზე.

ოზურგეთის მერიის ინფორმაციით, ავთანდილ თალაკვაძის თქმით, გაგრძელდება ოქროსმედალოსან და 100%-იანი სახელმწიფო გრანტის მფლობელი კურსდამთავრებულების წახალისებაც.

„არ ვივიწყებთ არც ოქროსმედალოსან კურსდამთავრებულებს და წელს მათ ერთჯერადად 300-300 ლარით წავახალისებთ. განვაგრძობთ ასევე, 100%-იანი სახელმწიფო გრანტის მფლობელი კურსდამთავრებულების წახალისებას, ისინი 3000 ლარით დაჯილდოვდებიან. 1500 ლარამდე გავზარდეთ აღმზრდელი სკოლისთვის განკუთვნილი პრემიის ოდენობაც, ის სკოლას ერთჯერადად გადაეცემა“, – აღნიშნა მერმა.