თავდაცვის მინისტრმა ჯუანშერ ბურჭულაძემ 26 მაისისადმი მიძღვნილ საზეიმო ღონისძიებაზე თავდაცვის ძალების გაძლიერებაზე ისაუბრა და საერთაშორისო პარტნიორებს მადლობა გადაუხადა.
„ამ რთულ, მნიშვნელოვანი გამოწვევების ეპოქაში, როცა ომი მიმდინარეობს შავი ზღვის რეგიონში და ევროპის უსაფრთხოების არქიტექტურა უდიდესი გამოწვევების წინაშეა, ჩვენი მიზანია უფრო მეტად გავაძლიეროთ ჩვენი ქვეყანა, მისი სახელმწიფო ინსტიტუტები და მათ შორის, განსაკუთრებით თავდაცვის ძალები. ეს არის მშვიდობისა და ჩვენი ქვეყნის გაძლიერების გზა, რომელიც საქართველოს მთავრობისა და პრემიერის გონივრულ და პრაგმატულ პოლიტიკასთან ერთად უზრუნველყოფს ჩვენი ქვეყნის მშვიდობასა და კეთილდღეობას. ამ გზაზე ჩვენ თანმიმდევრული პოლიტიკით გავზარდეთ ძალისხმევა თავდაცვისუნარიანობის გასაძლიერებლად და ეს მომავალშიც გაგრძელდება. პარტნიორების მხარდაჭერით, მიმდინარეობს თავდაცვის ძალების საბრძოლო საშუალებების გაძლიერება. გავაძლიერეთ და კიდევ უფრო ვითარდება ეროვნული სამხედრო მრეწველობა. ჩვენმა მთავრობამ, პარლამენტთან აქტიური მუშაობით მყარი საფუძველი შექმნა სამხედრო მოსამსახურეების სოციალური უზრუნველყოფის გარანტიებისთვის და ახალი ინსტიტუციური რეფორმებისთვის, რაც თავდაცვის ახალი კოდექსით იქნება დარეგულირებული. მადლობა მინდა გადავუხადო ნატო-სა და წევრ და პარტნიორ ქვეყნებს. ჩვენ ვაფასებთ თქვენს ურყევ პოლიტიკურ და პრაქტიკულ მხარდაჭერას. ბოლოს, კიდევ ერთხელ გილოცავთ საქართველოს დამოუკიდებლობის დღეს და გისურვებთ მშვიდობასა და ქვეყნის გამთლიანებას“, – განაცხადა ბურჭულაძემ.