რუსეთის პრეზიდენტი ვლადიმერ პუტინი ვიზების გაუქმებასთან დაკავშირებით საქართველოში შექმნილ ვითარებას გამოეხმაურა.
როგორც მან „დელოვაია როსიას“ წევრებთან შეხვედრაზე განაცხადა, ის საქართველოს რეაქციით გაკვირვებული იყო.
„ჩემთვის სრული მოულოდნელობა იყო რეაქცია, რომელიც ამას მოჰყვა. ვფიქრობდი, ყველა იტყოდა „აი, მადლობა, კარგია“. არა, იქ სრულიად გაუგებარი აურზაური ატყდა ამ საკითხზე. ძალიან გასაკვირია. უბრალოდ, სიმართლე გითხრათ, მოულოდნელად. გვერდიდან როდესაც ვუყურებ, ვფიქრობ: ნუთუ სულ გაგიჟდნენ? რა ხდება იქ მათთან, გაუგებარია“, – განაცხადა პუტინმა.
როგორც კრემლის ლიდერმა განმარტა, მან ასეთი გადაწყვეტილება დასვენების სეზონის მოახლოებიდან გამომდინარე მიიღო.
პუტინის თქმით, მას ასევე სურდა საქართველოში იმ ხალხის მხარდაჭერა, რომლებსაც რუსეთთან ნორმალური ურთიერთობების დალაგება სურთ და ასევე, რუსეთის იმ ბიზნესებისა და მოქალაქეების მხარდაჭერა, რომლებსაც მეზობელი ქვეყანა უყვართ.
„ჩვენ მზად ვართ, გზის ჩვენი მონაკვეთი გავიაროთ, როგორც უკვე ვთქვი, ნაბიჯებს ვდგამთ და გავაგრძელებთ იმის გათვალისწინებით თუ როგორი რეაქცია ექნებათ ამაზე ჩვენს პარტნიორებს“, – განაცხადა პუტინმა.
ამასთან, რუსეთის პრეზიდენტმა დასძინა, რომ საქართველომ თავად უნდა გადაწყვიტოს, როგორ განვითარდეს და რა გზით წავიდეს.
შეგახსენებთ, რომ 10 მაისს კრემლის ლიდერმა, ვლადიმერ პუტინმა საქართველოსთან სავიზო რეჟიმი გააუქმა.