თურქეთის მოქმედი პრეზიდენტი, რეჯეფ თაიფ ერდოღანი საარჩევნო უბანზე იმყოფებოდა, სადაც საპრეზიდენტო არჩევნებზე საკუთარი ხმა დააფიქსირა. მისი თქმით, მეორე ტურში ამომრჩევლის აქტივობა კვლავ მაღალია.
“დღევანდელ არჩევნებში, 14 მაისის არჩევნებთან შედარებით, სხვადასხვა პარტია არ იბრძვის. ახლა მხოლოდ ორი კანდიდატი მონაწილეობს. დღეს ჩვენმა მოქალაქეებმა თავიანთი არჩევანი ამ ორ კანდიდატს შორის უნდა გააკეთონ.
თურქეთის საპრეზიდენტო არჩევნების ისტორიაში პირველად ხდება, რომ მოქალაქეები მეორე ტურშიც ხმას აძლევენ. თურქეთის დემოკრატიისთვის ეს ძალიან მნიშვნელოვანი მოვლენაა. არჩევნებში 90% აქტივობა დაფიქსირდა, მსოფლიო ისტორიაში არცერთ ქვეყანაში ასეთი მაჩვენებელი და აქტივობა არ ყოფილა, თურქეთმა კი არჩევნები დემოკრატიულად და მშვიდობით ასეთი მაღალი აქტივობა აჩვენა მთელ მსოფლიოს. მჯერა, რომ დღესაც ასეთ აქტივობა დაფიქსირდება.
ჩვენს სამშობლოს სიმშვიდესა და გამარჯვებას ვუსურვებ და ვლოცულობთ, რომ ყველაფერი წყნარად და წარმატებულად ჩატარდეს. ეს ჩვენი ხალხისთვის ძალიან მნიშვნელოვანია”, – თქვა ერდოღანმა.
თურქეთში საპრეზიდენტო არჩევნების მეორე ტური მიმდინარეობს – მოქალაქეები არჩევანს მოქმედ პრეზიდენტ რეჯეფ თაიფ ერდოღანსა და 6 ოპოზიციური პარტიის საერთო კანდიდატ, ქემალ ქილიჩდაროღლუს შორის აკეთებენ.
ხმის მიცემის პროცედურა უკვე 4 საათია მიმდინარეობს და ის ადგილობრივი დროით 17:00 საათზე დასრულდება.
თურქეთის უზენაესი საარჩევნო საბჭოს მონაცემებით, 14 მაისს, არჩევნების პირველ ტურში ამომრჩეველთა აქტივობამ 90% შეადგინა, თუმცა ხმების აბსოლუტური უმრავლესობა ვერცერთმა კანდიდატმა ვერ მოიპოვა. პირველი ტური ერდოღანის უპირატესობით დასრულდა, მან ხმების 49.52% მიიღო, ქილიჩდაროღლუმ კი 44,88%.
მოსალოდნელია, რომ შედეგები 21:00 საათის შემდეგ გახდება ცნობილი.