ბრაზილიაში, რიო-დე-ჟანეიროს ერთ-ერთ სასტუმროში, საქართველოს მოქალაქე, 31 წლის მამაკაცი მოკლული იპოვეს.
ბრაზილიურ მედიაში გავრცელებულ ინფორმაციას ადასტურებს საქართველოს საგარეო საქმეთა სამინისტრო.
“ბრაზილიაში საქართველოს საელჩოში შევიდა ოფიციალური შეტყობინება საქართველოს მოქალაქის გარდაცვალების შესახებ. საელჩო კონტაქტზეა როგორც გარდაცვლილის ოჯახის წევრებთან, ასევე ადგილობრივ სამართალდამცავებთან. განხორციელდება შესაბამისი პროცედურები“, – განუცხადეს “ინტერპრესნიუსს“ საგარეო უწყებაში.
მკვლელობაში ბრალდებული დაკავებულია.
როგორც ბრაზილიური მედია წერს, ცხედარი სასტუმროს ნომერში 30 მაისს, სასტუმროს თანამშრომელმა მიბმული იპოვა და პოლიცია გამოიძახა.
მკვლელობის ბრალდებით დაკავებულია 41 წლის უოლას დე ოლივეირა გომესი, რომელიც სამართალდამცველებმა უსაფრთხოების კამერების ჩანაწერების მიხედვით ამოიცნეს. ის ძარცვისა და მკვლელობის ბრალდებით დააკავეს.
როგორც სასტუმროს თანამშრომელმა პოლიციასთან განაცხადა, უოლესი და ილია სასტუმროში დაახლოებით, ღამის ორ საათზე შევიდნენ, დილის ექვსი საათისთვის კი შენობა მხოლოდ ერთმა მამაკაცმა დატოვა.
მას შემდეგ, რაც მეორე მამაკაცმა სასტუმროდან გასვლა დააგვიანა, თანამშრომელს ეჭვი გაუჩნდა და ოთახის შესამოწმებლად შევიდა. იქ კი ცხედარი დახვდა.