შეგვიძლია თამამად ვთქვათ, რომ წელს აჭარა კიდევ უფრო მეტად ღირსეულად დახვდება ზაფხულის ტურისტულ სეზონს, – ამის შესახებ ეკონომიკის მინისტრის პირველმა მოადგილემ, მარიამ ქვრივიშვილმა „ქრონიკაში“ განაცხადა.
მისი თქმით, სხვა რეგიონებშიც ფაქტობრივად დასრულებულია ზაფხულის ტურისტული სეზონისთვის მზადება.
„აჭარის ადგილობრივი ტურიზმის დეპარტამენტთან ერთად ძალიან ბევრი მნიშვნელოვანი პროექტი განხორციელდა იმისთვის, რომ ღირსეულად დახვდეს აჭარა ზაფხულის ტურისტულ სეზონს. იქნება ეს მცირე ინფრასტრუქტურის მომზადება, თუ აჭარის ტურისტული პოტენციალის ცნობადობის გაზრდა. ჩვენ შეგვიძლია თამამად ვთქვათ, რომ წელს აჭარა კიდევ უფრო მეტად ღირსეულად დახვდება ზაფხულის ტურისტულ სეზონს. მინდა მოგახსენოთ, რომ ჩვენ ძალიან დიდი შრომა, დრო და რესურსი ჩავდეთ იმაში, რომ გვქონდეს კიდევ უფრო მეტი ფრენა ბათუმის საერთაშორისო აეროპორტში, გვქონდეს დივერსიფიცირებული ტურისტული ნაკადები. განსაკუთრებით გამოსაყოფია წლევანდელი წელი, რადგან ჩვენ გვექნება კიდევ უფრო მეტად გაზრდილი პირდაპირი რეისები სპარსეთის ყურის ქვეყნებიდან, ევროკავშირის წევრი ქვეყნებიდან და რა თქმა უნდა, ყველაფერი ეს გვაძლევს იმის თქმის საფუძველს, ვივარაუდოთ, რომ წლევანდელი ტურისტული სეზონი, მათ შორის ზაფხულის სეზონიც ერთ-ერთი ყველაზე წარმატებული იქნება ჩვენი ქვეყნისთვის. სხვა რეგიონებშიც ფაქტობრივად დასრულებულია მზადება ზაფხულის ტურისტული სეზონისთვის და ის ინიციატივა, რაც პრემიერ-მინისტრს გააჩნია, ერთ მილიარდიანი ინვესტიცია კურორტების რეაბილიტაციის, ხელს შეუწყობს ჩვენს ქვეყანაში ტურისტული ინფრასტრუქტურის გაუმჯობესებას“, – აღნიშნა მარიამ ქვრივიშვილმა.