რუსეთი უკრაინის ქალაქებს ისევ ბომბავს. ოკუპანტთა სამიზნე დნიპროში მდებარე ერთ-ერთი დასახლებული რაიონი გახდა. სარაკეტო დარტყმების შედეგად 2 წლის ბავშვი დაიღუპა. დაშავდა 20-მდე ადამიანი. მათ შორის შორის 5 ბავშვია. საჰაერო განგაში იყო ჩართული კიევშიც. ადგილობრივი ხელისუფლების ინფორმაციით, საჰაერო თავდაცვის სისტემამ კიევის მიმართულებით გაშვებული ყველა რაკეტა გაანეიტრალა.
ოკუპანტთა თავდასხმებს იგერიებს უკრაინა დონბასშიც. თავდაცვის მინისტრის მოადგილის ინფორმაციით, რუსულმა ძალებმა ბახმუტის მიმართულებით დაკარგული პოზიციების დაბრუნება რამდენჯერმე სცადეს, თუმცა უშედეგოდ. მისივე თქმით, მტერი იერიშებს ძირითადად ბახმუტის, ავდეევკის, ლიმანისა და მარიინკის მიმართულებით ახორციელებს, პერიოდულად კი წინ წაწევას შახტიორსკისა და კუპიანსკის მიმართულებით ცდილობს.
რუსული მედიის ცნობით, სარაკეტო თავდასხმა უკრაინამ ბერდიანსკსა და მელიტოპოლზე განახორციელა. ამავე ინფორმაციით, საჰაერო თავდაცვის სისტემებმა 8 რაკეტა ჩამოაგდეს. ვრცელდება ასევე ცნობები, რომ რუსეთის არმია ბელგოროდის ოლქის ქალაქ შებეკინოს ვეღარ აკონტროლებს. ამის შესახებ „რუსული მოხალისეთა კორპუსის“ ხელმძღვანელობა იტყობინება. მათი თქმით, მოსახლეობა ქალაქს მასიურად ტოვებს, თუმცა სამშვიდობო დერეფნების უსაფრთხოება უზრუნველყოფილი არ არის.