დიდი ბრიტანეთის პრემიერ-მინისტრის ტერეზა მეის განცხადებით, ის არ შეუშინდება დონალდ ტრამპის რეპლიკებზე რეაგირებას, თუ ჩათვლის, რომ ამერიკის შეერთებული შტატების პრეზიდენტის მინიშნებები იქნება დაუშვებელი, განსაკუთრებით კი როდესაც საქმე ქალთა უფლებებს ეხება.
ამის შესახებ მეიმ „ბი-ბი-სი“-სთან ინტერვიუში განაცხადა.
ტერეზა მეი დონალდ ტრამპს 27 იანვარს შეხვდება. ის იქნება პირველი მსოფლიო ლიდერი, რომელიც აშშ-ის პრეზიდენტს ინაუგურაციის შემდეგ შეხვდება.
ბრიტანეთის პრემიერის თქმით, მას სურს განავითაროს ურთიერთობები ლონდონსა და ვაშინგტონს შორის, რომელთაც მეის განცხადებით, აქვთ საერთო ინტერესები ისეთ სფეროებში, როგორიცაა ვაჭრობა, უსაფრთხოება და თავდაცვა.
„მან უკვე მითხრა, რომ სურს დიდ ბრიტანეთსა და აშშ-ს შორის ურთიერთობები იყოს ძლიერი და მომავალზე ორიენტირებული“,- განაცხადა ტერეზა მეიმ.
ტერეზა მეი დარწმუნებულია, რომ აშშ-ის ახალი ლიდერი ერთგული რჩება ჩრდილო ატლანტიკური ალიანსის, მიუხედავად მისი არაერთხელ გამოთქმული კრიტიკისა ნატო-ს მიმართ.