ოპოზიცია, რომელიც ცდილობს თავი მთავარ მედასავლეთედ წარმოადგინოს, ნადგურდება კანდიდატის სტატუსის მიღებით, – ამის შესახებ ფრაქცია „ქართული ოცნების“ თავმჯდომარემ და პარტია „ქართული ოცნების“ აღმასრულებელმა მდივანმა მამუკა მდინარაძემ განაცხადა.
მისივე თქმით, დღეს უკვე კანდიდატის სტატუსის მიღებით დაიწერა ისტორია ქართველ ხალხთან ერთად და ამ ისტორიას ვერაფერი შეცვლის. რაც არ უნდა ილაპარაკონ და მოიგონონ, მოსკოვის გავლით დასავლეთში არავის შეუშვებენ.
„დღევანდელმა დღემ აჩვენა, რომ ოპოზიციისგან გვერდით დგომის მოლოდინი არ უნდა გვქონდეს. ძალიან სამწუხაროა, ძალიან. ახლა აბსოლუტურად განადგურებული ოპოზიცია, საბედისწერო ამბავია მათთვის. ვითომ დეკლარირებენ დასავლელებად და დასავლურად, თავს წარმოაჩენენ დასავლელებად და კანდიდატის სტატუსი ანადგურებს ასეთ ოპოზიციას. პარადოქსი არ არის?! ოპოზიცია, რომელიც ცდილობს თავი მთავარ მედასავლეთედ წარმოადგინოს, ნადგურდება კანდიდატის სტატუსის მიღებით. არ არის პარადოქსი? ვინ რას ამბობს, გადავდოთ გვერდზე, ვინ რას აკეთებს და რა შედეგებს აღწევს, ყოველთვის ამით ამბობს ისტორია სათქმელს. ისტორია არის ის, რომ ჩვენ ასოცირების შეთანხმების, თავისუფალი ვაჭრობის შეთანხმების, ვიზალიბერალიზაციის, კონსტიტუციაში მთავარი ჩანაწერის, რომ ევროპული კურსია დავალება, განაცხადის შეტანით და დღეს უკვე, კანდიდატის სტატუსის მიღებით დავწერეთ ისტორია, ქართველ ხალხთან ერთად და ამ ისტორიას ვერაფერი შეცვლის. რაც არ უნდა ილაპარაკონ და მოიგონონ, მოსკოვის გავლით დასავლეთში არავის შეუშვებენ. ეს მითები ჩამოემსხვრათ თავზე და 1-2 ადამიანი დარჩა [სასესიო დარბაზში] მხოლოდ 5 წუთში ევროკავშირის ჰიმნის გახმოვანებიდან“, – აღნიშნა მდინარაძემ.