მაშინ, როდესაც უკრაინის დახმარების პაკეტის განხილვა აშშ-ის კონგრესში კვლავ შეჩერებულია, ამერიკა და მისი მოკავშირეები შეფასებას აძლევენ იმას, რასაც აღწერენ, როგორც პოტენციურად დამაზიანებელ ზემოქმედებას უკრაინის თავდაცვაზე და ომის წაგების გრძელვადიან პერსპექტივებს, – წერს CNN-ი სტატიაში სათაურით დასავლელი ოფიციალური პირების გაფრთხილება – უკრაინა რუსეთის წინააღმდეგ შეიძლება დამარცხდეს, თუ აშშ მეტ დახმარებას არ გაუწევს.
“ჩვენთან ერთად [უკრაინისათვის] წარმატების გარანტია არ არსებობს, მაგრამ ჩვენ გარეშე ისინი ნამდვილად განიცდიან მარცხს”, – განუცხადა ამერიკელმა სამხედრო მაღალჩინოსანმა CNN-ს.
ყველაზე საჭირბოროტო საკითხი იმას ეხება, თუ რა გავლენას მოახდენს შექმნილი ვითარება უკრაინის მიმდინარე კონტრშეტევაზე აღმოსავლეთსა და სამხრეთში.
“თუ განვიხილავთ ახალი ტერიტორიების დაპყრობისა და დაკავების შესაძლებლობას, ძნელი წარმოსადგენია, როგორ შეიძლება ამის მიღწევა შეერთებული შტატების მუდმივი მხარდაჭერის გარეშე”, – აღნიშნა ერთ-ერთმა ევროპელმა დიპლომატმა.
დასავლელი ოფიციალური პირები ასევე შიშობენ, რომ აშშ-ის მხარდაჭერის დაკარგვა ან შემდგომი შეფერხება გავლენას მოახდენს მოკავშირეების მხრიდან დახმარებაზე. მანამდე უნგრეთმა დაბლოკა ევროკავშირისგან უკრაინის შემდგომი დახმარება და ბევრი შიშობს, რომ თუ აშშ ვერ გააგრძელებს უკრაინის მხარდაჭერას, ევროპული ქვეყნები მიჰყვებიან მას.
“ახლა დასავლური სპეცსამსახურები ანგარიშობენ, რამდენ ხანს გაძლებს უკრაინა შეერთებული შტატებისა და ნატოს დახმარების გარეშე. აშშ-ის ერთ-ერთი სამხედრო მაღალჩინოსნის შეფასებით, ამას შეიძლება რამდენიმე თვე დასჭირდეს, ხოლო ყველაზე ცუდი სცენარი მოიცავს ზაფხულისთვის სერიოზულ წარუმატებლობას ან თუნდაც დამარცხებას”, – წერს CNN-ი.
ამერიკელმა და უკრაინელმა ოფიციალურმა პირებმა CNN-ს განუცხადეს, რომ უკრაინული ძალები უკვე შეზღუდულად იყენებენ საბრძოლო მასალას, რადგან რუსული ძალები გაცილებით დიდი ინტენსივობით ისვრიან, ვიდრე უკრაინის ძალებს შეუძლიათ.
დასავლელი ოფიციალური პირების შეფასებით, აშშ-ის დამატებითი დახმარების გარეშე, უკრაინას ჯერ ამოეწურება შორ მანძილზე მოქმედი რაკეტები, შემდეგ საჰაერო თავდაცვის რაკეტები, ხოლო შემდეგ კი საარტილერიო საბრძოლო მასალა და მცირე რადიუსის რაკეტები.
“არა მგონია, ხალხს ბოლომდე ესმოდეს, რას ნიშნავს რეალურად უკრაინის დაცემა. ჩვენ ვიხილავთ საშინელ რაღაცებს: ეთნიკურ წმენდას და უკრაინის სრულ განადგურებას. გაიხსენეთ რა ჩაიდინეს [რუსებმა] ბუჩაში. ასე რომ, ეს უკვე წარმატებაა, თუ ჩვენ შევძლებთ ამის თავიდან აცილებას. და ამიტომ უნდა გავაგრძელოთ [უკრაინის მხარდაჭერა]”, – განაცხადა ევროპელმა დიპლომატმა.