პარლამენტის ევროინტეგრაციის კომიტეტის თავმჯდომარე მაკა ბოჭორიშვილი თვლის, რომ კარგი იქნება ისევ ის მინისტრები თუ გააგრძელებენ მუშაობას მთავრობის გეგმაზე, ვინც ახლა მუშაობენ.
ასე უპასუხა ბოჭორიშვილმა „ქრონიკაში“ წამყვანის კითხვას, რას ნიშნავს ის ცვლილება, რომ მინისტრთა კაბინეტში მხოლოდ ერთი მინისტრი იცვლება.
„თავდაცვის მინისტრმა თავად ისურვა დატოვოს თანამდებობა და გადაინაცვლოს სხვა სფეროში. მას ახალი მინისტრი ჩაანაცვლებს. ხვალ თავად პრემიერ-მინისტრობის კანდიდატი წარუდგენს პარლამენტს თავის ხედვას. მუშავდება ათთვიანი გეგმა, რომელიც რეალურად იქნება გათვლილი არჩევნებამდე პერიოდამდე. ვერ ვიტყვით, რომ რაიმე პრობლემას ვხედავთ იმ ადამიანებში, რომლებიც მინისტრების თანამდებობაზე არიან დღეს. თუ არანაირი საფუძველი არსებობს იმის, რომ ირაკლი კობახიძეს როგორც უკვე პრემიერ-მინისტრს თავის ხედვების განხორციელებაში ხელს შეუშლის რაიმე, კარგი იქნება თუ ამ მიმართულებებზე მუშაობას გააგრძელებენ ის ადამიანები, ვინც აქამდე მუშაობდნენ“ , – აღნიშნა ბოჭორიშვილმა.
პრემიერ-მინისტრობის კანდიდატმა ირაკლი კობახიძემ მედიასთან განაცხადა, რომ ერთადერთი ცვლილება განხორციელდება მთავრობაში, თავდაცვის მინისტრის თანამდებობაზე წარდგენილი იქნება ირაკლი ჩიქოვანი.