ყველა პარტიას ასე თუ ისე რეიტინგი, სახელი მაინც აქვს, თქვენ გახარიას პარტიას გეძახიან. ეს არის სწორედ ლიდერომანიის ფაქტი. რას არ მოესწრება კაცი! ყოფილი კოლეგისგან იმას ისმენ, რასაც ჩვენ ერთად ვებრძოდით – „ნაცმოძრაობას“, – ამის შესახებ „ხალხის ძალის“ წევრმა, გურამ მაჭარაშვილმა პარლამენტის პლენარულ სხდომაზე განაცხადა.
მან პრემიერ-მინისტრობის კანდიდატსა და მისი გუნდის წევრებს წარმატება უსურვა და სხდომაზე პარლამენტარ ბექა ლილუაშვილის გამოსვლას გამოეხმაურა. მაჭარაშვილის თქმით, ლილუაშვილმა ირაკლი კობახიძეს დააბრალა „გავრილოვის ღამის“ დროს ქვეყანაში შექმნილი კრიზისი და „რუსული კანონის შემოტანა“.
„მან ძალიან კარგად იცის, რომ არ იყო არც რუსული კანონი და არც „გავრილოვის ღამეს“ ირაკლი კობახიძის ბრალეულობა, არამედ მათი დღევანდელი მოღალატე ლიდერის, ზუსტად კრიზისის შემქმნელის პროცესები იყო მაშინ. პოლიცია იქ დააყენა, სადაც არ უნდა დაეყენებინა. სწორედ ირაკლი კობახიძე იყო და ჩვენ, ყველა, რომელიც გადაეფარა მაშინდელ შს მინისტრს, რომელმაც როგორ აღმოჩნდა, განზრახ დაუშვა ის შეცდომები.
როდესაც საქართველო არ გიყვარს და იმ კრიზისულ პერიოდში გააკეთებ ისეთ გადაწყვეტილებას, რომ გადადგები, რათა მელია არ დაიჭირო, ეს ნიშნავს სწორედ იმას, რომ მოღალატეობრივი პოზიცია გაქვს. არ მგონია, რომ თქვენი რესურსი დღეს საერთოდ გაზომვადი იყოს“, – მიმართა მან ლილუაშვილს.
მისივე თქმით, გახარიას პარტიის გორისა და კასპის მაჟორიტარი წევრის წასვლის შემდეგ მათ კანდიდატი არ დააყენეს, რადგან ამის რესურსი არ ჰქონდათ.
„საზოგადოებამ თქვენი პარტიის დასახელებაც არ იცის. ყველა პარტიას ასე თუ ისე, რეიტინგი აქვს, სახელი მაინც აქვს, თქვენ გახარიას პარტიას გეძახიან. ეს არის სწორედ ლიდერომანიის ფაქტი. რას არ მოესწრება კაცი! ყოფილი კოლეგისგან იმას ისმენ, რასაც ჩვენ ერთად ვებრძოდით – „ნაცმოძრაობას“, – აღნიშნა მაჭარაშვილმა.