ჰოლანდიის ექსპრემიერი, დრის ვან აგტი მეუღლესთან, ეუგენიასთან ერთად გარდაიცვალა. ეს მოხდა 5 თებერვალს, თუმცა ინფორმაცია საჯაროდ რამდენიმე დღის შემდეგ გავრცელდა. მეუღლეებმა, რომლებიც ბოლო ხანებში მძიმედ იყვნენ ავად, გამოიყენეს ჰოლანდიაში კანონიერად მოქმედი ევთანაზია. ორივე მათგანი 93 წლის იყო.
ვან აგტი 1970-იან წლებში ხელმძღვანელობდა პარტიას “ქრისტიან-დემოკრატიული მოწოდება”, და ქვეყნის პრემიერ-მინისტრის რანგში მსახურობდა 1977 წლიდან 1982 წლამდე. შემდეგ წლებში იყო ჩრდილოეთ ბრაბანტის პროვინციის კომისარი, ევროკავშირის წარმომადგენელი იაპონიასა და აშშ-ში.
2019 წელს ვან აგტმა გადაიტანა ინსულტი, რომლის შემდეგაც მას ჯანმრთელობა სრულად აღარ აღუდგა. მისი მეუღლე, ეუგენიაც ბოლო წლებში ასევე მძიმედ ავადმყოფობდა. მეუღლეებმა გადაწყვიტეს ფიზიკური ტანჯვა შეეწყვიტათ და ცხოვრებიდან “ხელიხელჩაკიდებული” წასულიყვნენ. თანაცხოვრებაში მათ 70 წელი დაჰყვეს.