ბელგიელი ფერმერების საპროტესტო აქციების გამო ანტვერპენის პორტში, რომელიც ევროპის ერთ-ერთი უდიდესი პორტია, შეფერხებებია. პორტის მიმდებარე ტერიტორიაზე დაახლოებით 500 ფერმერი ტრაქტორებით ბლოკავს მოძრაობას.
„ფერმერების ქმედებები დიდ შეფერხებას იწვევს ანტვერპენის პორტში“, – აღნიშნულია პორტის განცხადებაში.
ბოლო ერთი თვის განმავლობაში პოლონეთში, საფრანგეთში, ესპანეთში, გერმანიასა და ევროპის სხვა ქალაქებში ფერმერების საპროტესტო აქციები იმართება. ფერმერების მოთხოვნებს შორის არის უკრაინიდან და ევროკავშირის სხვა არაწევრი ქვეყნებიდან სურსათის იმპორტის შეზღუდვა, რადგან ამ ქვეყნებს არ უწევთ ევროპული რეგულაციების თუ სტანდარტების დაცვა, შესაბამისად, პროდუქტს ევროპაში იაფად ყიდიან. ამასთან, სოფლის მეურნეობის წარმომადგენლები ითხოვენ საწვავის ღირებულების შემცირებას და გარემოსდაცვითი კანონმდებლობის შერბილებას. კერძოდ, საქმე ეხება კანონპროექტს, რომელიც ფერმერებს ავალდებულებს, დაუმუშავებელი დატოვოს კუთვნილი მიწის ოთხი პროცენტი, რათა ბიომრავალფეროვნება იყოს შენარჩუნებული.