უკრაინის თავდაცვის სამინისტროს დაზვერვის მთავარი სამმართველოს დრონებმა შავ ზღვაში რუსეთის დიდ სადესანტო გემზე, „ცეზარ კუნიკოვზე“ დარტყმა განახორციელეს. ინფორმაციას ამის შესახებ უკრაინული მედია დაზვერვის მთავარ სამმართველოში არსებულ წყაროებზე დაყრდნობით ავრცელებს.
როგორც „უკრაინსკაია პრავდას“ სადაზვერვო უწყებაში წყაროებმა განუცხადეს, ეს იყო მათი ოპერაცია, რომლის შედეგადაც სამხედრო ხომალდი ჩაიძირა.
უკრაინის ხელისუფლების წარმომადგენლებს აღნიშნულ ინფორმაციასთან დაკავშირებით ოფიციალური კომენტარი არ გაუკეთებიათ. კომენტარი არ გაკეთებულა არც რუსეთის თავდაცვის სამინისტროში, თუმცა გამთენიისას რუსეთის თავდაცვის უწყება იტყობინებოდა, რომ ღამით შავი ზღვის აკვატორიის თავზე ექვსი უპილოტო საფრენი აპარატი გააუვნებელყვეს.
ტელეგრამარხებში დილით გავრცელდა ცნობები შავ ზღვაში რამდენიმე აფეთქებისა და რუსულ სამხედრო ხომალდზე თავდასხმის შესახებ. რუსეთის შავი ზღვის ფლოტის ცნობით, „ცეზარ კუნიკოვის“ სიგრძე – 112, ხოლო სიგანე 15 მეტრია. მისი ეკიპაჟი 87 ადამიანს შეადგენს.