ფაქტია, რომ უდანაშაულო ადამიანი მოკლეს და მკვლელობის ჩამდენი პირები უნდა დაისაჯონ. კონკრეტული მტკიცებულებებით არის დადასტურებული, რომ მათ ჩაიდინეს დანაშაული, – ამის შესახებ გადაცემაში „იმედი LIVE“ როინ შავაძის მკვლელობის საქმეზე საუბრისას ადვოკატმა, რამინ პაპიძემ განაცხადა.
ადვოკატი არ გამორიცხავს, რომ გამოძიების პროცესში დამნაშავეთა წრე კიდევ გაფართოვდეს.
„როინ შავაძე მოკლეს 2008 წლის 16 აგვისტოს. ეს იყო გაქცევის იმიტაცია, თითქოს ის გაქცევას აპირებდა ბადრაგირების დროს, რაც სიცრუეა და გამოძიებითაც დადასტურდა. სამწუხაროდ, ჩვენ დაზარალებულის უფლებამონაცვლის სტატუსიც ვერ მოვიპოვეთ 2016 წლამდე. აბსოლუტურად უდანაშაულო ადამიანი თითქოს დააკავეს ნარკოტიკული საშუალების შეძენა-შენახვისთვის. დადასტურებულია რასაც ვაცხადებდით, რომ გაყალბებული იყო ე.წ. ჩხრეკის ოქმი, რომ თითქოს გარდაცვლილს ჩხრეკის დროს ნარკოტიკული ნივთიერება ამოუღეს. ცდილობდნენ საზოგადოების შეცდომაში შეყვანას, თითქოს ის იყო მოღალატე, თუმცა გამოძიება არ დაწყებულა სახელმწიფოს წინააღმდეგ მიმართული დანაშაულის ჩადენის ფაქტზე. ფაქტია, რომ პიროვნებასთან იყო შეუთავსებლობა, მიუღებლობა, შესაძლოა ვიღაცასთან პიროვნული დაპირისპირებაც იყო. ამ ეტაპზე გამოძიებას კონკრეტული მიზეზი დადგენილი არ აქვს, თუმცა, ამას არსებითი მნიშვნელობა არ აქვს, რადგან ფაქტია, რომ უდანაშაულო ადამიანი მოკლეს და მკვლელობის ჩამდენი პირები უნდა დაისაჯონ. კონკრეტული მტკიცებულებებით არის დადასტურებული, რომ მათ ჩაიდინეს დანაშაული. გამოძიება ცოცხალი პროცესია და შესაძლებელია, რომ ამ დაკავებებს მოჰყვეს კიდევ სხვა პირების დაკავებაც“, – აღნიშნა ადვოკატმა.
პროკურატურამ როინ შავაძის უკანონო დაკავებისა და განზრახ მკვლელობის ბრალდებით 2 პირი დააკავა.