ლიეტუვას პარლამენტმა (სეიმი) მხარი დაუჭირა დეპუტატ რემიგიუს ჟემაიტისისთვის სადეპუტატო იმუნიტეტის ჩამორთმევას, რათა მისი მხრიდან გაკეთებულ სავარაუდო ანტისემიტურ განცხადებებზე გამოძიება ჩატარდეს.
კენჭისყრაში მონაწილე 77-მა კანონმდებელმა ამ წინადადებას ერთხმად დაუჭირა მხარი.
ლიეტუვას კანონმდებლობის მიხედვით, პარლამენტარისთვის სამართლებრივი იმუნიტეტის ჩამორთმევის შესახებ დადგენილების მისაღებად, 141 დეპუტატიდან, მინიმუმ, 71-მა უნდა მისცეს ხმა.
ქვეყნის გენერალურმა პროკურორმა, ნიდა გრუნსკენემ ორშაბათს თხოვნით მიმართა სეიმს, რომ ჟემაიტისის სამართლებრივი დევნისთვის დაეჭირა მხარი.
პროკურატურას დეპუტატის პასუხისგებაში მიცემა ებრაული წარმოშობის ადამიანთა ჯგუფის მიმართ საჯარო დაცინვის, ზიზღის გამოხატვისა და სიძულვილის გაღვივების გამო სურს.
წინასწარი გამოძიების დროს შეგროვებულ მტკიცებულებებზე დაყრდნობით, პროკურატურა ამტკიცებს, რომ გასული წლის 9 და 13 ივნისს, ასევე 14 და 15 ივნისს გამოქვეყნებულ ფეისბუკ-პოსტებში ჟემაიტისმა, „შესაძლოა, საჯაროდ დასცინა, გამოხატა ზიზღი და გააღვივა სიძულვილი ებრაელი ეროვნების ხალხის მიმართ“.
იმავდროულად, ჟემაიტისი ამტკიცებს, რომ პროკურატურის ეს ნაბიჯი იმ ცილისმწამებლური კამპანიის ნაწილია, რომელიც მაისში დაგეგმილ საპრეზიდენტო არჩევნებში მის მონაწილეობას უკავშირდება. დეპუტატი ასევე ირწმუნება, რომ მისი ფეიასბუკ-გამონათქვამები სიძულვილის ენას არ მიეკუთვნება.
გასული წლის ივნისში სოციალურ ქსელში გამოქვეყნებილ პოსტებში პარლამენტარი წერდა, რომ მეორე მსოფლიო ომის დროს, „ებრაელები და რუსები“ ეთნიკურ ლიეტუველებს ავიწროებდნენ და პასუხისმგებელნი იყვნენ 1944 წელს სოფელ პირჩიუპიაიში მოწყობილ მასობრივ ხოცვა-ჟლეტაზე. სინამდვილეში, ეს სისასტიკე გერმანული SS-ის ჯარებმა ჩაიდინეს.
ჟემაიტისმა ასევე გამოაქვეყნა ინფორმაცია ისრაელის მიერ მდინარე იორდანეს დასავლეთ სანაპიროზე განადგურებული პალესტინური სკოლის შესახებ. ამ ინფორმაციასთან დაკავშირებით, დეპუტატმა აღნიშნა, რომ ისრაელის ქმედებები „ზრდის რისხვასა და სიძულვილს ებრაელი ერის მიმართ”, რის შემდეგაც ანტისემიტური კუპლეტის ციტირება მოახდინა.
პარლამენტმა ჟემაიტისის იმპიჩმენტის პროცესი სწორედ ფეისბუქის ამ პოსტების გამო დაიწყო.
ჟემაიტისი პარლამენტში პარტია „თავისუფლება და სამართლიანობას“ წარმოადგენდა, მაგრამ დეპუტატის მანდატი გასული წლის მაისში სწორედ ზემოთ აღნიშნული პოსტების გამო შეუჩერდა. იანვარში მან ახალი პარტია დაარეგისტრირა და საპრეზიდენტო არჩევნებში მონაწილეობის შესახებ გააკეთა განცხადება.